Ekvadordaǵy jer silkinisi: qutqarýshylar úıindiniń astynda 13 kún jatqan er adamdy alyp shyqty
ASTANA. QazAqparat - Venesýela qutqarýshylary Ekvadorda bolǵan jer silkinisinen 13 kún ótken soń úıindiniń astynan aman qalǵan er adamdy alyp shyqty. Bul týraly senbi kúni Ekvadordaǵy Venesýela elshiliginen habarlady.
"29 sáýirde keshke Sımon Bolıvardyń qutqarýshylary Haramıho qalasyn baıqap júrgende ishinara qıraǵan ǵımarattan shyqqan dybys estigen. Olar ishinen qabyrǵanyń qulaýy saldarynan shyǵa almaı turǵan 72 jastaǵy Manýel Vaskesti tapty", - delingen elshilik habarlamasynda.
Onyń aqparatynsha, er adamǵa sozylmaly búırek aýrýy, qatty shóldeý jáne álsireý dıagnozy qoıyldy. Sonymen qatar, ol sol aıaǵyndaǵy birneshe barmaǵynan aıyryldy, dep habarlady TASS.
16 sáýirde soltústik-batystaǵy Manabı provıntsııasynda Pedernales qalasynda 7,8 magnıtýdaly jer silkinisi oryn aldy. Sońǵy málimetterge qaraǵanda, apat saldarynan 660 adam qaza tapty, 48 - iz-túzsiz joǵalǵan dep sanalsa, 17 myńnan astamy medıtsınalyq kómekke júgindi. Elge keltirilgen materıaldyq zalal birneshe mıllıard dollarǵa baǵalanyp otyr.
