Ekvadordaǵy saılaýda Danıel Noboa jeńiske jetti

ASTANA. KAZINFORM — Ekvadordyń Ulttyq saılaý keńesi (USK) qazirgi prezıdent Danıel Noboany prezıdenttik saılaýdyń ekinshi týrynyń jeńimpazy dep atady. Bul týraly USK basshysy Dıana Atamaınt baspasóz máslıhatynda málimdedi, dep jazady Reprt.

— USK «Ulttyq-demokratııalyq áreket» partııasynan usynylǵan kandıdattar — Danıel Noboa men Marııa Hose Pıntony (prezıdent jáne vıtse-prezıdent laýazymdaryna — red.) jeńimpaz dep esepteıdi, — dedi ol.

Buǵan deıin Noboanyń qarsylasy Lýısa Gonsales jeńilisti moıyndaýdan bas tartyp, daýysty qaıta sanaýǵa shaqyrǵan bolatyn.

USK 92,64% hattamany óńdegennen keıin jarııalanǵan derekterge sáıkes, Noboaǵa saılaýshylardyń 55,88%-y, al Gonsaleske 44,12%-y daýys bergen. Kandıdattar arasyndaǵy aıyrmashylyq 1,1 mıllıonnan astam daýysqa jetken.

Aıta keteıik, buǵan deıin Ekvadorda prezıdenttik saılaýdyń ekinshi kezeńi ótýi múmkin ekenin jazyp edik.