Ekvadordaǵy bılıard klýbynda bolǵan atystan jeti adam qaza tapty

ASTANA. KAZINFORM — Ekvadordyń soltústik-batysyndaǵy Santo-Domıngo-de-los-Tsachılas provıntsııasynda belgisiz qarýly adamdar bılıard klýbyna oq jaýdyrǵan.  Olar áskerı forma kıgen. Bul týraly Sınhýa agenttigi jazdy.

Atys kezinde kem degende jeti adam qaza taýyp, taǵy úsh adam jaraqat alǵan. Bul týraly jergilikti BAQ habarlady.

Qarýly top keshki saǵat 22:30 shamasynda avtokólikpen kelip, Nýevo-Amaneser aýdanyndaǵy bılıard klýbynda otyrǵan adamdarǵa qaraı retsiz oq jaýdyrǵan.

Bul — sońǵy bir aı ishindegi ekinshi shabýyl. Buǵan deıin, 17 tamyzda, dál osy provıntsııadaǵy bılıard klýbynda bolǵan shabýyldan da jeti adam mert bolǵan.

Ekvadordaǵy Uıymdasqan qylmys jónindegi baqylaý ortalyǵynyń málimetinshe, 2025 jyldyń alǵashqy alty aıynda elde 4619 kisi óltirý tirkelgen. Bul — ótken jylmen salystyrǵanda 47%-ǵa kóp jáne el tarıhyndaǵy eń joǵary kórsetkish.

Osy jaǵdaılarǵa baılanysty el prezıdenti Danıel Noboa 2024 jyldyń qańtarynda Ekvadorda «ishki qarýly qaqtyǵys» rejımin jarııalap, esirtki kartelderine qarsy kúresti kúsheıtti.

Eske sala keteıik, buǵan deıin Ekvador prezıdenti Danıel Noboa ishki tártipsizdik pen qarýly qaqtyǵystardyń kúsheıýine baılanysty jeti provıntsııa men úsh mýnıtsıpalıtette 60 kúndik tótenshe jaǵdaı jarııalaǵanyn jazǵan edik.