Ekvadorda júrgizýshiler ereýilinen keıin birneshe provıntsııada tótenshe jaǵdaı engizildi
ASTANA. KAZINFORM — Ekvador prezıdenti Danıel Noboa seısenbi kúni jeti provıntsııada 60 kúnge tótenshe jaǵdaı jarııalady, dep habarlaıdy Sınhýa.
Bul sheshim kólik júrgizýshileriniń kásipodaqtary dızel otynynyń qymbattaýyna baılanysty ereýil jarııalaǵannan keıingi «el ishindegi jappaı tártipsizdikterge» baılanysty qabyldandy.
Buǵan deıin, juma kúni prezıdent Noboa dızel otynyna beriletin sýbsıdııalardy alyp tastaý týraly sheshim qabyldaǵan edi. Bul sheshim dúısenbi kúni jappaı ereýilge sebep boldy. Prezıdenttiń aıtýynsha, polıtsııa men tótenshe qyzmetter usynǵan esepterge sáıkes, narazylyqtar men joldardyń jabylýy saldarynan «qoǵamdyq tártipke qater tóndirgen» oqıǵalar údeı túsken. Osyǵan baılanysty tótenshe jaǵdaı engizilgen.
Jarlyqqa sáıkes, tótenshe jaǵdaı rejımin engizý beıbit sıpattaǵy jáne basqa azamattardyń quqyqtary, bostandyqtary men kepildikterine nuqsan keltirmeıtin mıtıngter ótkizý quqyǵyn shekteýdi kózdemeıdi.
Sondaı-aq, qarýly kúshter men ulttyq polıtsııaǵa eldegi qoǵamdyq tártipti saqtaý, zorlyq-zombylyqtyń aldyn alý, azamattardy qorǵaý, qozǵalys erkindigi men ekonomıkalyq qyzmettiń qaýipsizdigin qamtamasyz etý boıynsha qajetti sharalar qabyldaýǵa ruqsat berildi.
Budan buryn Ekvadordaǵy bılıard klýbynda bolǵan atystan jeti adam qaza tapqanyn jazǵan edik.