Ekvadorda jer silkinisinen keıin júzge jýyq jazasyn óteýshi túrmeden qashyp ketti

ASTANA. QazAqparat - Senbi kúni bolǵan jer silkinisinen keıin Ekvadordyń Manabı provıntsııasyndaǵy túrmeden 100-ge jýyq jazasyn óteýshi qashyp ketti. Alaıda olardyń 30-yn polıtseıler ustady. Keıbireýleri túzetý mekemesine óz erkimen bardy, dep jazdy Twitter-degi shaǵyn blogyna eldiń ádilet mınıstri Ledı Sýnıga.

Bul týraly Lenta.ru habarlady.

«Portovehodaǵy túrmeden 100-ge jýyq jazasyn óteýshi qashty. Biz olardy Ekvador polıtsııasymen birlesip izdeýdemiz», - dedi Ledı Sýnıga.

Mınıstr tabıǵı apat túrme ınfraqurylymyn da buzǵanyn atap ótti. Jazasyn óteýshiler arasynda qaza tapqandar jáne jaraqat alǵandar bolǵany ne bolmaǵany týraly aqparat joq.

Buǵan deıin Ekvador prezıdenti Rafael Korrea jer silkinisinen keıin qaza tapqandardyń sany 233 adamǵa jetkenin málimdegen. Ol jerasty dúmpýi saldarynan Manta eldi mekeni qatty zardap shekkenin aıtty. Korrea bul qalaǵa ózi bara jatqany jaıly habarlaǵan edi.