Ekvadorda jer silkinisinen keıin 50-ge jýyq adamdy izdeý jumystary jalǵasyp jatyr
ASTANA. QazAqparat - Jer silkinisinen zardap shekken Ekvadorda 48 adamnyń áli de taǵdyry belgisiz bolyp qalyp otyr. Bul týraly ońtústikamerıkalyq eldiń qaýipterdi basqarý mınıstrliginen habarlady.
Vedomstvonyń málimetterinshe, zilzala saldarynan qaza tapqandardyń sany 655 adamdy qurap otyr, 29 myńnan astam adam ýaqytsha pana tapty. Bul rette úıindilerdiń astynda 113 turǵyn aman alyp shyǵaryldy.
Ekvadorǵa 27 memleket kómek kórsetken. Senbi kúni Ekvador astanasy Kıto qalasynyń mańynda Ońtústikamerıkalyq ulttar Odaǵy Syrtqy ister mınıstrleriniń kezdesýi bolyp ótken. Ekvador SІM-niń basshysy Gııom Longtyń habarlaýynsha, uıym jer silkinisinen zardap shekken elge kómek kórsetýdi jalǵastyrýǵa kelisti.
Aıta keteıik, Ekvadorda magnıtýdasy 7,8 jerasty dúmpýleri 16 sáýirdiń keshinde tirkelgen. Jer silkinisiniń oshaǵy Mýısne eldi mekeninen ońtústik-shyǵysqa qaraı 28 shaqyrym jerde ornalasqan, tereńdigi - 20,2 shaqyrym. Tabıǵı apat soqqysynan kópqabatty qonaqúıler, meıramhanalar, turǵyn úıler opyrylyp qulady. Eń kóp zardap shekken provıntsııalar - Esmeraldas, Manabı, Santo-Domıngo-de-los-Tsachılas, Gýaıas, Santa-Elena jáne Los-Rıos. Senbi kúni Ekvador prezıdenti Rafael Korrea qaza tapqandardy segiz kún aza tutýdy jarııalaý týraly jarlyqqa qol qoıatynyn málimdedi.
