Ekvadorda vıtse-prezıdent para alǵany úshin alty jylǵa sottaldy
ASTANA. QazAqparat - Ekvador soty eldiń vıtse-prezıdenti Horhe Glasany qyzmetinen bosatyp, alty jylǵa bas bostandyǵynan aıyrdy jáne Odebrecht brazılııalyq qurylys kompanııasynyń isi boıynsha para alǵany úshin 33 mln dollar aıyppul saldy, dep habarlaıdy Reuters agenttigi.
Bul jemqorlyqqa qatysty is boıynsha sottalǵan alǵashqy joǵary laýazymdy sheneýnik.
Glas burynǵy memleket basshysy Rafael Korreeniń kezinde vıtse-prezıdent bolyp jumys istedi jáne saılaýda Lenın Moreno jeńiske jetkennen keıin de óz qyzmetinde qaldy. Alaıda, keıingi prezıdent onyń «komandalyq oıynshy» emes ekendigin alǵa tartyp, tamyz aıynda Glasty qyzmetinen shettetken. Qazanda sot Glasty Odebrecht isi boıynsha qamaýǵa alý týraly sheshim shyǵardy.
Al, qarashada sot Glastyń para alýdy uıymdastyrǵany úshin sot aldynda jaýap beredi dep tapty.
Prokýratýra deregi boıynsha, Glas ekonomıkanyń strategııalyq sektoryndaǵy bes memlekettik kelisimshartty bergeni úshin brazılııalyq kompanııadan 13,5 mln dollar kóleminde para alǵan bolýy múmkin.
