Ekvadorda prezıdenttik saılaýdyń ekinshi kezeńi ótýi múmkin

ASTANA. KAZINFORM — Ekvadorda prezıdenttik saılaýdyń ekinshi kezeńi ótedi, sebebi qazirgi kezde eseptelgen 90 paıyzdan astam daýys eshbir kandıdattyń jeńiske jetý úshin qajetti daýys sanyn jınaı almaǵanyn kórsetip otyr.

Sınhýa aqparat agenttiginiń málimetinshe, Ulttyq saılaý keńesiniń dúısenbi kúni jarııalanǵan málimetine sáıkes, daýystardyń 92,82 paıyzy eseptelgennen keıin qazirgi prezıdent — «Ulttyq demokratııalyq qozǵalystan» kandıdat Danıel Noboa 44,5 paıyz daýyspen alda ekeni belgili boldy. 

Odan keıin tizimde 43,86 paıyz daýys jınaǵan «Azamattyq revolıýtsııa» solshyl qozǵalysynyń kandıdaty Lýısa Gonsales tur. 

Úshinshi orynda 5,04 paıyz daýyspen «Pachakýtık kópultty birligi qozǵalysynan» kandıdat Leonıdas Iza tur. 

Ekvador konstıtýtsııasyna sáıkes, kandıdat 50 paıyzdan astam daýys jınasa nemese keminde 40 paıyz daýys jınap, qarsylasynan 10 paıyzdan astam basym tússe birinshi týrda prezıdent bolyp saılanady.

Ekvadorlyqtar jeksenbi kúni el prezıdenti, vıtse-prezıdent, Ulttyq assambleıanyń (parlament) 151 múshesin jáne And parlamentiniń bes múshesin saılaý úshin daýys berý ýchaskelerine bardy.

Buǵan deıin habarlanǵandaı, Ekvadorda prezıdent saılaýy ótip jatyr. Ekvadorda halqy tórt jyl boıy eldi basqaratyn memleket basshysyn tańdaıdy.