Ekvadorda prezıdenttikke kandıdatty atyp ketti
KITO. QazAqparat – Ekvador prezıdenttigine úmitker, eldiń Ulttyq jınalys depýtaty Fernando Vılıavısensıo sársenbi kúni el astanasy Kıtoda saılaýaldy kezdesýden keıin mert boldy. Onyń basyna úsh ret oq atylǵan, dep habarlaıdy QazAqparat BBC-ge silteme jasap.
Onyń saılaýaldy tobynyń múshesi jergilikti BAQ-qa habarlaǵandaı, Vılıavısensıo mashınaǵa otyrǵan kezde er adam oǵan jaqyndap, basyna oq atqan. Onyń qazasyn qazirgi prezıdent Gılermo Lasso áleýmettik jelide rastady. Kýágerler Vılıavısensıoǵa úsh ret oq atqanyn málimdedi, atqan adam oqıǵa ornynan qashyp ketken.
Ekvadorda esirtki kartelderiniń kóbeıýinen týyndaǵan zorlyq-zombylyq qylmystarynyń artýy F.Vılıavısensıonyń saılaýaldy baǵdarlamasynyń basty máselesi boldy.
Ótken aıda prezıdent G.Lasso uıymdasqan qylmysqa baılanysty birqatar kisi ólimi bolǵannan keıin 3 provıntsııada tótenshe jaǵdaı jáne túngi komendanttyq saǵat jarııalady. Qaýipsizdikten basqa, F.Vılıavısensıonyń saılaýaldy baǵdarlamasy sybaılas jemqorlyqpen kúresýge jáne qorshaǵan ortanyń buzylýyn azaıtýǵa baǵyttalǵan. Ótken aptada oǵan jáne onyń komandasyna esirtki satýmen baılanysty bandanyń jetekshisi qoqan-loqqy jasaǵany aıtylǵan bolatyn.
Polıtsııa Ekvador prezıdenttigine úimtker Fernando Vılıavısensıony óltirdi degen kúdikpen eki adamdy ustady. Bul týraly sársenbide Ecuavisa habarlady. Málim etilgendeı, saıasatkerge úsh adam oq atqan. Polıtsııa úshinshisin izdep jatyr.
Elde prezıdent saılaýynyń birinshi týry 20 tamyzǵa josparlanǵan.
