Ekvadorda prezıdent saılaýy ótip jatyr
ASTANA.KAZINFORM - Halyq sany 18 mıllıonnan asatyn Ekvadorda 13 mıllıonnan astam saılaýshy 24 provıntsııadaǵy 4 349 saılaý ýchaskesinde daýys berip jatyr, dep habarlaıdy Anadoly agenttigi.
Ekvadorda halyq tórt jyl boıy eldi basqaratyn memleket basshysyn tańdaý úshin saılaýǵa keledi.
Elde 18 jastan asqan jáne 65 jasqa deıingiler úshin daýys berý mindetti. Saılaý jergilikti ýaqyt boıynsha saǵat 17:00-ge deıin jalǵasady.
Saılaý nátıjesinde jańa memleket basshysy men onyń orynbasaryn, sondaı-aq Ekvador ulttyq jáne aımaqtyq assambleıalarynyń músheleri anyqtalady.
16 adam Ekvador prezıdenti bolýǵa úmitker. Saýalnama nátıjesi boıynsha eki úmitker birinshi orynǵa shyǵyp otyr. Tartys qazirgi prezıdent Danıel Noboa men solshyl kandıdat Lýıza Gonsales arasynda ótedi dep boljanyp otyr.
Úmitkerler birinshi týrda jeńiske jetý úshin daýystardyń 50 paıyzyn nemese eń jaqyn qarsylasynan 10 paıyz basymdyqpen kem degende 40 paıyz daýys alýy kerek. Áıtpese, saılaýdyń jeńimpazy ekinshi týrda anyqtalady.
Buryn aımaqtaǵy salystyrmaly túrde tynysh el sanalǵan Ekvador 2018 jyldan beri qylmys sanynyń artýy boıynsha alǵa shyqty. Sońǵy jyldary eki iri kokaın óndirýshi - Kolýmbııa men Perý arasynda ornalasqan el AQSh pen Eýropaǵa baratyn joldaǵy esirtki tasymalynyń mańyzdy tranzıttik núktesi rólin atqardy.
2023 jylǵy merziminen buryn prezıdenttik saılaý
2023 jylǵy prezıdenttik naýqan elde buryn-sońdy bolmaǵan zorlyq-zombylyqtyń órshýimen erekshelendi. Prezıdenttik saılaýdyń birinshi kezeńine eki apta qalǵanda kandıdat Fernando Vılıavısensıoǵa qastandyq jasaldy. Bir kúnnen keıin taǵy bir saıasatker, «Azamattyq revolıýtsııa» solshyl saıası qozǵalysynyń jetekshisi Pedro Brıonesti úıiniń janynda belgisiz bireýler atyp ketken. Basqa kandıdattardyń saılaýaldy úgit-nasıhat jumystary 17 tamyzda erte aıaqtalýy kerek edi, al qorytyndy jıyndarda kandıdattar oq ótpeıtin jılet kıip sóz sóıledi. Saılaý naýqany kezinde esirtki toptarymen tabandy kúresýge ýáde bergen 36 jastaǵy Danıel Noboa saılaýda jeńiske jetti.