Ekvador parlamenti eks-prezıdentti jemqor dep tanydy
Beısenbi kúni Ekvador parlamenti burynǵy prezıdent Gılermo Lassony memleket qarajatyn jymqyrdy dep tanyp, aqparatty prokýratýraǵa joldady. Kazinform bul týraly TASS jańalyqtaryna silteme jasap habarlaıdy.
«Qoldap, 116 daýys berilgennen keıin Ulttyq assambleıa Gılermo Lassony urlyǵy úshin saıası jaýapkershilikke tartylýy tıis dep sheship, prokýratýra men qadaǵalaý organyna tıisti tergeýdi bastaý úshin saıası protsestiń barlyq qujattaryn jiberdi», – delingen Parlamenttiń X áleýmettik jelisindegi paraqshasynda.
Zań shyǵarýshylar G.Lassonyń FLOPEC memlekettik munaı tasymaldaýshy kompanııasynyń sybaılas jemqorlyq shemasyna qatysy bar dep sanaıdy. Bul rette parlamentshiler eks-prezıdentke memlekettik laýazymdardy atqarýǵa tyıym sala almaıtyndyqtaryn moıyndady, óıtkeni bul el konstıtýtsııasynda kózdelmegen.
Ókilettik merzimi 2025 jyly aıaqtalýy tıis bolǵan G.Lasso bıylǵy 17 mamyrda Ulttyq assambleıany taratý, merziminen buryn prezıdent jáne parlament saılaýyn ótkizý týraly jarlyqqa qol qoıdy. 17 qarashada zań shyǵarýshy organnyń jańa quramy jumysqa kiristi, ol eks-prezıdenttiń kinási týraly máseleni qaraýdy jalǵastyrýǵa sheshim qabyldady. 23 qarashada Danıel Noboa prezıdent qyzmetine kiristi. Kelesi parlamenttik jáne prezıdenttik saılaý Ekvadorda 2025 jyly ótýi tıis.
