Ekvador Germanııany jeńip, álem chempıonatynyń pleı-off kezeńine shyqty
ASTANA. KAZINFORM – Ekvador quramasy AQSh-tyń Nıý-Djersı shtatynda ótken 2026 jylǵy fýtboldan álem chempıonatynyń E tobyndaǵy sońǵy matchynda Germanııany 2:1 esebimen jeńip, 1/16 fınalǵa joldama aldy, dep habarlaıdy FIFA.
Germanııa kezdesýdiń 2-mınýtynda esep ashty. Leroı Zane ulttyq qurama sapyndaǵy alǵashqy golyn soǵyp, Germanııanyń álem chempıonattaryndaǵy 1934 jyldan bergi eń jyldam golynyń avtory atandy.
Ekvador 9-mınýtta tarazy basyn teńestirdi. Jartylaı qorǵaýshy Nılson Angýlo mergendik tanytyp, alǵashqy taımda esepti 1:1-ge jetkizdi.
Ekinshi taımnyń basynda tóreshi Germanııanyń paıdasyna penaltı belgilegenimen, beıneqaıtalaý júıesi (VAR) arqyly epızodty qaıta qarap, Leroı Zaneniń Pedro Vıtege buǵan deıin ereje buzǵanyn anyqtap, sheshimin ózgertti.
Ekvador jeńis golyn 77-mınýtta soqty. Kevın Rodrıges dopty Gonsalo Plataǵa baǵyttap, ol dál soqqymen dopty qaqpanyń joǵarǵy buryshyna kirgizdi.
Jeńilgenine qaramastan, Germanııa quramasy dop aıyrmasy boıynsha Kot-d’Ivýardan basym túsip, alty upaımen toptaǵy birinshi ornyn saqtap qaldy. Kot-d’Ivýar da toptyq kezeńdi alty upaımen aıaqtady.
Buǵan deıin álem chempıonatynyń on tórtinshi oıyn kúniniń qorytyndysy boıynsha Shveıtsarııa, Kanada, Brazılııa jáne Marokko quramalary 1/16 fınalǵa joldama alǵany, al Ońtústik Afrıka quramasy óz tarıhynda alǵash ret pleı-off kezeńine shyqqany habarlanǵan.
Sondaı-aq Kolýmbııa ekinshi ret jeńip, pleı-off satysyna shyqty.
