EKSJ Jobalyq keńsesiniń kóshpeli otyrysynda 4 óńirge qatysty syn aıtyldy
PAVLODAR. KAZINFORM — EKSJ Jobalyq keńseniń kóshpeli otyrysynda jylý berý maýsymyna daıyndyq pen Ulttyq jobany iske asyrý máseleleri talqylandy.
Premer-mınıstrdiń orynbasary Qanat Bozymbaev Pavlodarda «Energetıkalyq jáne kommýnaldyq sektorlardy jańǵyrtý» ulttyq jobasynyń Jobalyq keńsesiniń alǵashqy kóshpeli otyrysyn ótkizdi. Qatysýshylar óńirlerdiń aldaǵy jylytý maýsymyna daıyndyǵyn, kommýnaldyq ınfraqurylymdy jańǵyrtý jobalarynyń iske asyrylý barysyn, jergilikti atqarýshy organdardyń qatysý reıtıngterin, sondaı-aq buryn berilgen tapsyrmalardyń oryndalýyn talqylady.
Otyrys barysynda EKSJ ulttyq jobasyn iske asyrýdyń qazirgi kezdegi qarqyny, konkýrstyq rásimderdiń barysy, jobalardy qarjylandyrý máseleleri jáne óńirlerdiń jóndeý naýqanyn ótkizýge daıyndyǵy qaraldy.
Bıyl elimizdiń turǵyn úı-kommýnaldyq sharýashylyǵy salasyna shamamen 1,3 trln teńge ınvestıtsııa tartylǵan. Onyń 767 mlrd teńgesi EKSJ ulttyq jobasy aıasynda baǵyttaldy. Bul jalpy quny 164,8 mlrd teńge bolatyn 37 pılottyq jobany iske asyrýǵa kirisýge múmkindik berdi.
459 mlrd teńgeniń 242 jobasy konkýrstyq rásimder satysynda tur. 175 nysan boıynsha merdigerlik uıymdar anyqtaldy. Qarjylandyrý halyqaralyq qarjy uıymdarynyń, ekinshi deńgeıdegi bankterdiń qarajaty, «Báıterek» holdınginiń quraldary, sondaı-aq syıaqy mólsherlemelerin sýbsıdııalaýdy qosa alǵanda, memlekettik qoldaý sharalary esebinen qamtamasyz etiledi.
Ulttyq jobany iske asyrýǵa óńirlerdiń qatysý reıtıngine de erekshe nazar aýdaryldy. Monıtorıng derekteri boıynsha, birqatar óńirler konkýrstyq rásimderdi ótkizý jáne sharttar jasasý boıynsha artta qalyp otyr. Eń tómen kórsetkishter Almaty jáne Shymkent qalalarynda, sondaı-aq Túrkistan oblysy men Ulytaý oblysynda tirkelgen.
Qanat Bozymbaev barlyq qajetti qarjylandyrý tetikteri men memlekettik qoldaý sharalary qabyldanǵanyn, al óńirlerdiń basty mindeti qurylys-montajdaý jumystaryn ýaqtyly bastaý jáne jobalardy sapaly iske asyrý bolyp qala beretinin atap ótti.
Sonymen qatar, Pavlodar oblysy EKSJ ulttyq jobasyn iske asyrý boıynsha neǵurlym belsendi óńirlerdiń biri retinde atap ótildi. Óńirde sońǵy 30 jylda alǵash ret ınjenerlik ınfraqurylymnyń tozýyn toqtatýǵa qol jetkizildi.
2025-2027 jyldary munda jalpy quny 131,6 mlrd teńge bolatyn 55 jobany iske asyrý josparlanǵan. Qazirgi ýaqytta jalpy uzyndyǵy 92,4 km bolatyn jylý jáne elektrmen jabdyqtaýdyń 16 obektisinde qurylys-montajdaý jumystary júrgizilýde. Іske asyrylyp jatqan jobalardyń quny 21,7 mlrd teńge.
Buǵan qosa, Pavlodar oblysy 2027 jylǵa arnalǵan jobalar sany boıynsha respýblıkada ekinshi orynǵa shyqty. Olar jalpy quny 109,9 mıllıard teńge bolatyn 39 jobany qamtıtyn úlken ótinim bazasyn daıyndady. Bul rette iske asyrylyp jatqan jobalardaǵy qazaqstandyq ónimder men mamandardyń úlesi (otandyq mazmun) 100%-dy qurap otyr.
— Ulttyq jobany iske asyrý úshin barlyq qajetti sheshimder men qarjylandyrý tetikteri memleket tarapynan qabyldandy. Búginde óńirlerdiń negizgi mindeti — jumysty sapaly úılestirýdi qamtamasyz etý, konkýrstyq rásimderdi ýaqtyly ótkizý jáne qurylys-montajdaý jumystaryna kirisý. Pavlodar oblysynyń tájirıbesi kórsetip otyrǵandaı, jınaqtalǵan ınfraqurylymdyq problemalardyń basym bóligin júıeli túrde jáne belgilengen merzimde sheshýge bolady, — dedi Qanat Bozymbaev.
Jıynǵa qatysýshylar otandyq ónimniń úlesin arttyrý máselesin bólek talqylady. Ulttyq joba aıasynda qazaqstandyq taýarlar men qyzmetterdi kóbirek paıdalaný, sondaı-aq kommýnaldyq júıelerdi jańartý jumystaryna otandyq óndirýshilerdi belsendi tartý joldary pysyqtaldy.
Otyrys qorytyndysy boıynsha Qanat Bozymbaev jumysy keshigip jatqan jobalardy tez arada retke keltirýdi jáne barlyq konkýrsty qysqa merzimde aıaqtaýdy tapsyrdy.
Sondaı-aq Ulttyq jobaǵa qazaqstandyq óndirýshilerdi tartý boıynsha naqty mindetter júkteldi. Ónerkásip jáne qurylys mınıstrligine 1 shildege deıin otandyq taýar óndirýshilerdiń tizilimin (QTÓ tizilimi) jańartý jáne Elektrondyq platformanyń tolyqqandy jumys isteýine kedergi bolyp turǵan kemshilikterdi joıý tapsyryldy.
Taýarlardy Elektrondyq platformadan tys jáne Ulttyq jobanyń bekitilgen erejelerin aınalyp ótip satyp alýǵa múldem bolmaıtyny erekshe eskertildi. Jaýapty memlekettik organdarǵa Jobalyq keńseniń kelesi jıynyna deıin barlyq tapsyrmanyń oryndalýyn qamtamasyz etý júkteldi. Oryndalmaı qalǵan árbir tapsyrma eskerilip, sonyń qorytyndysynda memlekettik organdar men jobaǵa qatysýshylardyń jumysy qanshalyqty tıimdi ekenine jeke baǵa beriledi.
Eske sala keteıik, Qanat Bozymbaev Pavlodar oblysyna jumys sapary aıasynda búgin tańerteń Ekibastuz qalasynda bolyp, jańaryp jatqan jylý jelilerimen tanysty.
Premer-mınıstrdiń orynbasary sondaı-aq, Aqsý jáne Pavlodar qalalaryndaǵy EKSJ jobalarynyń iske asyrylýyn tekserdi.
