EKSJ ulttyq jobasy aıasynda satyp alýdyń elektrondy platformasy iske qosyldy
ASTANA. KAZINFORM — Premer-mınıstrdiń orynbasary Qanat Bozymbaevtyń tóraǵalyǵymen «Energetıkalyq jáne kommýnaldyq sektorlardy jańǵyrtý» ulttyq jobasyn júzege asyrý jónindegi jobalyq keńseniń otyrysy ótti, dep habarlaıdy Úkimettiń baspasóz qyzmeti.
Qarasha aıynan bastap meks.zakup.sk.kz elektrondy satyp alý platformasy iske qosyldy. Bul júıede Ulttyq jobaǵa qatysýshy barlyq kommýnaldyq kásiporyndar tirkelgen.
— Qazir 26 kásiporyn shamamen jarty trıllıon teńge bolatyn 174 joba boıynsha ótinim berdi. 2026 jylǵa arnalǵan taýarlarǵa degen qajettilik aıqyndalyp, 680 áleýetti ERS-merdiger men 172 otandyq óndirýshi anyqtaldy. Olar Ulttyq jobany júzege asyrýǵa qajetti ónim jetkizýge daıyn, — delingen habarlamada.
Sondaı-aq otyrysta az qamtylǵan azamattardy turǵyn úımen qoldaý sharalary qaraldy. Bıyl 9,6 myń otbasy kommýnaldyq qyzmet shyǵyndarynyń bir bóligin óteý túrinde kómek alǵan.
Qanat Bozymbaev jaýapty memlekettik organdarǵa kómekti taǵaıyndaý rásimin jeńildetip, qoldanystaǵy qoldaý sharalary týraly halyqty keńinen aqparattandyrýdy tapsyrdy.
Budan buryn Bozymbaev energetıka salasyndaǵy satyp alý platformasyn 1 qarashaǵa deıin engizýdi tapsyrǵan edi.