EKSJ belsendi kezeńge kóshti: Bozymbaev Jobalyq keńseniń negizgi baǵyttaryn aıqyndady
ASTANA. KAZINFORM – Qanat Bozymbaev «Energetıka jáne kommýnaldyq sektorlardy jańǵyrtý jónindegi Ulttyq jobany» (EKSJ) júzege asyrýǵa arnalǵan Jobalyq keńseniń otyrysyn ótkizdi. Bul týraly Úkimettiń baspasóz qyzmeti habarlady.
Jıynda zań shyǵarý jumystary, jobany qarjylandyrý, satyp alýlar tártibi, otandyq óndirýshilerdi qoldaý jáne tsıfrlandyrý máseleleri boıynsha esepter tyńdaldy.
Ulttyq jobany zańnamalyq turǵyda qamtamasyz etý maqsatynda Memleket basshysy 17 shildede tıisti zańǵa qol qoıyp, ol 29 shildeden bastap kúshine engen bolatyn.
Búginde Jobalyq keńse 669 lıtsenzııasy bar EPC-jetkizýshileri, 220 otandyq óndirýshini jáne EKSJ aıasynda qajet bolatyn 2,7 myń taýar pozıtsııasyn saraptap shyqty.
Búginde Ulttyq joba aıasynda taýarlardy, jumystardy jáne qyzmetterdi satyp alýǵa, «kiltimen tapsyrýǵa daıyn» qurylys kelisimsharttaryn jasaýǵa, jobalardy irikteý men monıtorıng júrgizýge múmkindik beretin elektrondyq satyp alý platformasy ázirlenýde. Joba tetikterin túsindirý úshin «1465» nómiri boıynsha baılanys ortalyǵy iske qosyldy.
EKSJ aıasynda pılottyq joba retinde 35 tabıǵı monopolııa sýbektisi (TMS) bekitildi. Taǵy 22 joba qaralý satysynda. Jyl sońyna deıin 8,5 myń shaqyrym ınjenerlik jelilerdi jóndeý jáne 42 myńnan astam jabdyqty aýystyrý josparlanǵan. 2026 jylǵa qaraı 6 TMS tozýdyń «qyzyl» deńgeıinen «ortasha» deńgeıine kóship, tozý kórsetkishi 40%-ǵa deıin tómendeıdi dep kútilip otyr.
Pılottyq jobalardy qarjylandyrý operatorlary retinde «Qazaqstan turǵyn úı kompanııasy» AQ jáne «Qazaqstannyń Damý Banki» qarastyrylyp otyr. Sondaı-aq bes qazaqstandyq bank EKSJ-ge qatysýǵa qyzyǵýshylyq bildirgen. Sonymen qatar halyqaralyq qarjy ınstıtýttaryn tartý jumystary jalǵasýda.
Qanat Bozymbaev 2026 jylǵa arnalǵan jobalardy josparlaý kezinde jergilikti atqarýshy organdar EKSJ sheńberinde kózdelgen naryqtyq tetikterdi paıdalanbaı, áli de bıýdjet qarjysyna arqa súıep otyrǵanyn atap ótti.
– Memlekettik organdar tıisti ınfraqurylymdy jańǵyrtý endi EKSJ súzgisinen ótetinin, jobalardy naryqtyq tetikter arqyly júzege asyrý múmkindigi baǵalanatynyn túsinýi kerek. Bıýdjet qarajaty tek balama bolmaǵan jaǵdaıda ǵana qoldanylady. Bul – Úkimettiń naqty ustanymy, - dedi vıtse-premer.
EKSJ tetigi arqyly jobalardy bıyl qazan aıynda tolyq iske qosý úshin Qanat Bozymbaev Jobalyq keńsege birqatar tapsyrma júktedi.
Ákimdikterge óńirlerdiń energetıkalyq jáne kommýnaldyq ınfraqurylymyn jańǵyrtý boıynsha «Jańǵyrtý kartalaryn» ázirleý tapsyryldy. Bul kartalar negizinde salalyq memlekettik organdar TMS jobalaryn olardyń tozý deńgeıin eskere otyryp, jańǵyrtý tártibin aıqyndaıdy. Odan keıin tehnıkalyq jáne qarjylyq operatorlar qajetti qarjy kóleminiń aldyn ala esepterin daıyndaıdy. Qoljetimdi qarjylandyrý kólemi men josparlanǵan jumystar týraly aqparat EKSJ-ni naqty júzege asyrý josparyn jasap, negizgi kórsetkishterdiń (KPI) oryndalýyn tıimdi monıtorıngteýge múmkindik beredi.