Ekstremızmniń aldyn alý salasyndaǵy mamandardy daıarlaýǵa Egıpetten sarapshylar shaqyrtyldy
Instıtýt jat aǵymdarmen kúres júrgizý maqsatynda jergilikti ımamdardy oqytatyn bolady.
«Búginde meshitke keletin jamaǵattyń 85-90 paıyzy jastar. Al jalpy elimizdegi rýhanı izdeniske túsken jandar ǵalamtor arqyly jat aǵymdardyń ýaǵyz-nasıhatyna ılanyp jatady. Jat aǵym jetegindegilermen jumys jasaý úshin osyndaı top kerek edi. Sebebi ımamdardyń jalpy bilimi bolsa da, dál teris dinı toptardyń alǵan baǵytyna qarsy kúres máselesi bólek ádisti talap etpek. Sondyqtan, biz osy jaǵdaılardy eskere otyryp, aldaǵy 1-2 jylda 200-300-ge deıin mamandarymyzdy qaıta daıarlaý kýrsynda bilimderin pysyqtaımyz degen úmittemiz»,- dedi «Ekstremızmniń aldyn alý salasyndaǵy mamandardy qaıta daıarlaý ınstıtýtynyń» ashylý saltanatynda QMDB tóraǵasy, Bas múftı Erjan qajy Malǵajyuly.
Beıresmı derekter boıynsha qazir elimizde 16 myńǵa jýyq adam jat aǵym jeteginde. E.Malǵajyulynyń sózine qaraǵanda, endi budan bylaı el arasyndaǵy ekstremıstik toptar men jat aǵymdarǵa qarsy kúresýshi mamandardy daıarlaý máselesi myqtap qolǵa alyna bastaıdy.
«Bizdiń ýnıversıtet shákirt tárbıelep qana qoımaı, el ishindegi dinı máseleler men túıtkildermen de kúresýge daıyn. Sebebi bul barshamyzǵa ortaq múdde. Sondyqtan, men Mysyrda eki el arasyndaǵy kelisimderge saı birshama laýazymdy azamattarmen jolyqqan edim. EAR Ýaqyftar mınıstri Mýhammad Juma myrzanyń sizderge arnaıy sálemin joldaımyn. Bolashaqta bul jańa ınstıtýtqa ál-Azhar ýnıversıtetinen osy salaǵa mamandanǵan arnaıy 2 professor keletinin aıtqym keledi», - dedi Nur-Múbarak ýnıversıtetiniń rektory, professor Jýda Basıýnı.
Bul bastama 2016 jyldyń 10 maýysynda QR Prezıdenti N.Á.Nazarbaevtyń tóraǵalyǵymen QR Qaýipsizdik Keńesi otyrysynda memlekettik organdarǵa júktelgen birqatar tapsyrmalarǵa sáıkes júzege asyp otyr. Elbasy nusqaýyna saı QR UQK Tóraǵasynyń birinshi orynbasary S.Ábishtiń tóraǵalyǵymen Jumys toby qurylǵan bolatyn. Atalǵan Jumys toby QR MSM men QR BǴM-ne jańa ınstıtýtty Nur-Múbarak EIM ýnıversıteti janynan ashýǵa tapsyrma júktegen-di. Sebebi bul ýnıversıtet bilikti mamandar men ǵalymdardyń ortalyǵyna aınalǵandyqtan olar ıslam, din tóńireginde kez-kelgen saýalǵa jaýap bere alady. Bir ǵana Mysyrdyń ál-Azhar ýnıversıtetinen 14 ǵylym doktory qyzmet etedi.
Jańadan ashylǵan ınstıtýt dırektory bolyp Nur-Múbarak ýnıversıtetiniń oqytýshysy, PhD doktor Qaırat Qurmanbaev taǵaıyndaldy. Elimizdiń ár aımaǵynan kelgen 20 ımamǵa ınstıtýt mamandary dáristerin bastap ketti.
«Barlyq aımaqtardan, Shyǵys Qazaqstan, Batys Qazaqstan oblysynan, Almaty oblysynan ımamdar keldi. Oqytýshyny biz Egıpetten shaqyrttyq. Eki sarapshy sol jaqtan keledi. Kýrs ár eki aı saıyn bolady. Onda ımamdar teris aǵymdarmen kúresýdiń ádistemesin úıretý úshin oqytylady. Tek qana salafızm emes, Islamda aǵymdar óte kóp. Odan keıin Iegova kýágerleri, hrıstıandardyń aǵymdary bar Qazaqstanda. Solarmen qalaı kúresý kerek, olarǵa kirgen azamattarmen qalaı jumys jasaý kerek, aǵymdardy kirgizbeý úshin qandaı aldyn alý sharalaryn qoldaný qajet - osyndaı jumystar jasalady. Eki aılyq kýrsqa 20 ımam keledi, olardyń saparyn meshitter ózderi qarjylandyrady. Oblystardan kelip jatyr. Biz arabsha oqyǵan, arab tilinde sóıleı alatyn, túsine alatyn ımamdardy ǵana jınadyq. Buryndary osy salada qyzmet jasap júrgen salafı aǵymdarǵa qarsy qyzmet jasap júrgen ımamdar bar, ár oblystan osy qyzmetimen, biliktiligimen kózge túsken qyzmetshilerdi shaqyrttyq. Ár eki aıda kýrs ótedi, bıyl úsh kýrs boıynsha oqytyp shyǵaramyz dep jatyrmyz. Buǵan jalpy suranys artyp jatyr ǵoı», - deıdi QMDB Dinı bilim jáne ǵylym bóliminiń meńgerýshisi Baqtybaı Beısenbaev.
