Ekstremızm jáne lańkestikpen baılanysty qylmystar sany 61,3 paıyzǵa artyp otyr - QR Bas prokýratýrasy

ASTANA. QazAqparat - Aǵymdaǵy jyldyń 1 toqsanynda Qazaqstannyń quqyq qorǵaý organdary ekstremızm jáne lańkestikpen baılanysty 50 qylmys tirkedi.

Bul ótken jyldyń sáıkes kezeńimen salystyrǵanda 61,3 paıyzǵa artyq, dep habarlady QR Bas prokýratýrasynyń baspasóz qyzmetinen.

«Ekstremızm men lańkestikke baılanysty qylmystardyń negizgi bóligin áleýmettik, ulttyq, násildik jáne dinı jaýlyqty qozdyrý faktilerin quraıdy. Ótken kezeńde 15 qylmystyq isti tergeý aıaqtaldy, qylmystyq jaýapkershilikke 9 tulǵa tartyldy», - delingen habarlamada.

Vedomstvonyń habaryna qaraǵanda, 2012-2014 jyldary ishinde júrgizilgen sot-tergeý tájirıbesi aldyn alý jumystarynyń nátıjesinde radıkaldy dinı aǵymdy jaqtaýshylar óz qatelikterin túsinip, dástúrli dinge oralǵandyǵyn kórsetti.

«Máselen, Aqtóbede ulttyq qaýipsizdik organdary lańkestik pen dinı arazdyq ıdeıasyn nasıhattap júrgen radıkaldy toptyń zańǵa qaıshy jolyn kesti. Atalǵan tulǵalarmen teologtar jumys istep, birneshe márte júrgizilgen jeke áńgimelesý barysynda dinniń mán-jaıy, qarýly jıhad qaýiptiligi túsindirildi. Júrgizilgen jumystardyń nátıjesinde salafılik radıkal N. burynǵy ustanymynan bas tartyp, dástúrli hanafı mazhabyna moıynsundy», - delingen habarlamada.