Ekstremızm úshin shetel asqandardyń tólqujatyn jaramsyz etý máselesi qaralýda - Ǵ.Shoıkın
ASTANA. QazAqparat - Terror jáne ekstremızm baǵytyna erip, shetel asqan qazaqstandyqtardy azamattyǵynan aıyrmaı, olardyń tólqujatyn jaramsyz dep taný máselesi qaralýda.
Bul týraly búgin «Din salasyndaǵy ózekti máselelerdi jarııalaý jónindegi aqparattyq jumystyń qaǵıdalary men basymdyqtary» atty din salasyndaǵy máselelerdi BAQ-ta jarııalaý boıynsha jýrnalısterge arnalǵan trenıng barysynda QR Mádenıet jáne sport mınıstrligine qarasty din isteri komıtetiniń tóraǵasy Ǵalym Shoıkın málim etti.
Onyń aıtýynsha, birqatar elder qazir terrorızm men ekstremızmge qarsy zańnamalaryn jetildire otyryp, óz zańdaryna teris dinı aǵymǵa erip, basqa elde terrorlyq áreketke barǵan, bolmasa, soǵysyp júrgen adamdardy syrttaı azamattyǵynyn aıyrý týraly normany engizgen.
«Mysaly, Ázerbaıjan memleketi jýyrda ǵana azamattyq týraly zańǵa ózgerister engize otyryp, terrorlyq áreketterge qatysý úshin basqa elderge ketken azamattaryn Ázerbaıjan azamattyǵynan aıyrý týraly sheshim qabyldady. Kóptegen elder terrorızm týraly zańnamalyq aktilerge osy ózgeristerdi engizý týraly sheshim qabyldaýda. Biz bul tájirıbeni zerdelep jatyrmyz», - degen komıtet tóraǵasy osyndaı ózgeris bir jaǵynan zııanyn tıgizýi múmkin ekenin atap ótti.
«Azamattyqtan aıyrýdyń teris saldary bolýy múmkin. Sebebi, biz teris dinı aǵymǵa erip, shetelge ketken azamattardy azamattyǵynan aıyrsaq, ol endi Qazaqstan Respýblıkasynyń zańdaryna baǵynbaıtyn adam bolyp shyǵa keledi. Ol, tipti, ózge eldiń azamattyǵyn alyp alyp, Qazaqstanǵa qonaq retinde kelse, biz oǵan zań turǵysynan jaza qoldana almaımyz. Sondyqtan, qazir biz terrorlyq jáne ekstremıstik baǵytta el asyp ketken qazaqstandyqtardy azamattyǵynan aıyrmaı, tólqujattaryn jaramsyz etý máselesin qarastyryp jatyrmyz», - dep málim etti Ǵ.Shoıkın.
