Ekstremızm men terrorızmdi nasıhattaıtyndar jazaǵa tartylady - zańger
Zańger ekstremızm jáne terrorızmniń aldyn alý jumystaryn túsindirdi, dep habarlaıdy QazAqparat tilshisi.
Omarbek Aqymbekov, jınalǵandarǵa QR aýmaǵynda terrorızmdi nasıhattaýǵa, terrorıstik uıymdardyń, zańsyz áskerılendirilgen qurylymdardyń qurylýyna, tirkelýine jáne jumys isteýine tyıym salynǵanyn aıtty.
«Beıbit jınalystar, mıtıngter, sherýler, pıketter jáne demonstratsııalar ótkizgen kezde ekstremızmdi júzege asyrýǵa jol berilmeıdi. Respýblıkalyq mańyzy bar qalalardyń jergilikti atqarýshy organy osyndaı sharany uıymdastyrýshylarǵa jaýaptylyq týraly jazbasha eskertý beredi. Eger bul talaptar oryndalmasa zań aldynda jaýap beredi»,-deıdi zańger Omarbek Aqymbekov.
Omarbek Aqymbekov, kezdesý barysynda radıkaldy jáne ekstremıstik toptardyń ıdeologııasyn nasıhattaýshylardyń jazaǵa tartylatynyn da jetkizdi.
«Qazir elimizde ulttyq, rýlyq, násildik, áleýmettik jáne dinı arazdyqty tutandyrýǵa baǵyttalǵan toptar zań aldynda jaýap beredi. Estremısttik top qurý, sol sııaqty oǵan basshylyq etkenderdiń múlki tárkilenip, on jyldan on jeti jylǵa deıin bas bostandyǵynan aıyrý jazasy qarastyrylǵan. Ekstremısttik toptyń áreketine nemese onyń jasaıtyn qylmystaryna qatysqandar segiz jyldan on jylǵa deıin sottalady»,- deıdi zańger Omarbek Aqymbekov.
Kezdesý bir saǵatqa sozyldy. Osy ýaqyt aralyǵynda «Zeta» óndiristik kompanııasynyń jumysshylary zańǵa qatysty biraz saýaldar qoıdy. Sonymen qatar, olar ekstremızm men terrorızmniń aıyrmashylyǵy men baılanysyn túsindirip berýlerin surady.
«Jasyratyny joq qazir osy ekstremızm men terrorızm degen sózdi jıi estıtin boldyq. Tipti qorqamyz. Tumshalanyp kıinip alǵandardy kórsek záre qutymyz qashdy ( kúldi). Solar bizdi jaryp jiberetindeı kórinedi. Biz balalarymyz úshin alańdaımyz. Negizi jastardy qorǵaý qajet. Árıne ata-ana bolǵan soń bilgenimizdi aıtamyz ǵoı. Desekte, túsindirý jumystary jastarǵa qajet dep oılaımyn. Sizge rahmet. Bizge kelip zań turǵysynan túsindirip berdińiz. Biz bilmeıtin nárseler barshylyq eken»,- dedi «Zeta» óndiristik kompanııasynyń qyzmetkeri.
Aıta keteıik, bul aqparattyq túsindirý jumystary Almaty qalalyq Qoǵamdyq damý basqarmasynyń uıymdastyrýymen ótip jatyr.
