Ekstremıstik uıymdar óz ıdeıalaryn taratýda paıdalanýshylardyń 90 paıyzyn jastar quraıtyn - ınternetti tıimdi qoldanýda
ASTANA. 15 qarasha. QazAqparat - Ekstremıstik toptar men uıymdar óz ıdeıalaryn taratýda ǵalamtor keńistigin tıimdi paıdalanýda.
Bul týraly búgin elordada ótip jatqan Qazaqstan din tanýshylarynyń ІІ Forýmynda QR Din isteri agenttigine qarasty Mádenıetter men dinderdiń halyqaralyq ortalyǵynyń
dırektory Aıdar Ábýov aıtty.
Onyń atap ótýinshe, búginde álem elderin dinı ekstremızm men lańkestik alańdatyp otyr. Onyń saldary adamdardyń quqyqtary men bostandyqtaryna zııanyn tıgizý ústinde. Sońǵy jyldary elimizdiń batys, ońtústik óńirlerinde de adam qazasyna ákelgen lańkestik kórinister de oryn aldy.
«Qazirgi ýaqytta elimiz dúnıejúzi elderimen qatar shekarasyz keńistik sanalatyn ǵalamtor álemindegi kóptegen lańkestik máselelermen jolyǵýda. 21 ǵasyr jetistigi sanalatyn ınternet óziniń ashyqtyǵy men qoljetimdiligi arqasynda ekstremıstik uıymdardyń qyzyǵýshylyǵyn týyndatty. Búgingi kúni ekstremıstik toptar men uıymdar óz ıdeıalaryn taratý men adam tartýda ınternet keńistigin tıimdi qoldanýda», - dedi ol.
Onyń paıymynsha, ǵalamtor qoldanýshylardyń 90 paıyzyn jastar quraıtyn eskerer bolsaq, onda ekstremızmniń ınternet keńistigindegi kórinisiniń aldyn alýdyń mańyzdylyǵy men ózektiligi aıqyndala túsedi.
«Búgingi kúni kóptegen jastardyń dinge degen qyzyǵýshylyqtary artyp keledi. Meshit ımamdarynyń úıretýinen tys ıslamdy túsingisi kelgen jastar, álbette ınternet saıttardan basqa da jat pıǵyldy aqparat kózderine jolyǵýda. Teris pıǵyldy aqparattar jastardyń psıhııalyq oı-órisine, sana-sezimine keri áser etip, ulttyq rýhanı baǵytta ósip-órkendeýine kedergi keltiretini anyq», - dedi A.Ábýov.
