Ekstremıstik toptarǵa qatysatyndardyń 80 paıyzy jastar - J. Dáýrenov
ASTANA. QazAqparat - Ekstremıstik toptarǵa qatysatyndardyń 80 paıyzy jastar, olardyń arasynda qazaqstandyq jastar da bar. Búgin Astana qalalyq kóshi-qon saıasaty basqarmasy men «Ulaǵat» qory uıymdastyrǵan dóńgelek ústel barysynda Mádenıet jáne sport mınıstrligi Din isteri komıtetine qarasty «Mádenıet pen dinniń halyqaralyq ortalyǵy» basqarmasy dırektorynyń orynbasary Jorabek Dáýrenov málim etti.
«Qazirgi kúni terrorızm men ekstremızm sekildi qaterlermen kúres problemasy asa ózekti bolyp barady, al onyń taralý aýmaǵy men qarqyny álemdik qaýymdastyqqa qater tóndirip otyr. Sonyń ishinde ekstremıstik áreketterge jastardy tartýǵa baılanysty jaǵymsyz úrdister erekshe alańdaýshylyq týdyrady. Sarapshylardyń baǵalaýy boıynsha ekstremıstik toptarǵa qatysýshylardyń 80 paıyzǵa jýyǵy 20 men 30 jas aralyǵyndaǵy azamattar. Ókinishke qaraı, olardyń arasynda Qazaqstannyń keleshegi sanalatyn jastarymyz da bar», - dedi J. Dáýrenov.
Onyń aıtýynsha, destrýktıvti uıymdar men ekstremıstik toptarǵa jastardyń qosylýyna basty sebepterdiń biri radıkaldy úndeýlerge qarsy psıhologııalyq ornyqtylyqtyń jetkiliksizdigi, dinı saýattylyqtyń tómendigi, laıyqty bilimniń joqtyǵy. Sonymen qatar, ońaı aqsha tabý men tez baıýdy oılaǵandar da, ómirdegi ókinishterine kek alýdy maqsat etkender de osyndaı ortaǵa tap bolyp jatady.
Eske sala keteıik, sharaǵa jastar uıymdarynyń, memlekettik organdar, dinı mekemeler men úkimettik emes uıymdar, oqý mekemeleriniń ókilderi qatysty.
