Ekstremıstik toptardyń maqsaty - Ortalyq Azııa aýmaǵynda orta ǵasyrdaǵy sekildi halıfat qurý - Iogan Merkel
ASTANA. 22 qarasha. QazAqparat - Ekstremıstik toptardyń maqsaty Ortalyq Azııa aýmaǵynda orta ǵasyrdaǵy sekildi halıfattyq basqarýdy qurý bolyp otyr.
Búgin Parlament Májilisinde ótip jatqan konferentsııa barysynda sóz sóılegen QR Bas prokýrorynyń birinshi orynbasary Iogan Merkel osylaı málim etti.
«Mamandar «Ál-Kaıda» men «Talıban» sekildi halyqaralyq terrorızmniń tiregine aınalǵan uıymdardyń Aýǵanstanda saqtalýy, al osy elden halyqaralyq kúshterdiń ketýi ekstremıstik-terrorıstik baǵyttaǵy basqa da toptardyń belsendi áreket etýine jaǵdaı týǵyzatynyn aıtady. Jalpy mundaı toptardyń maqsaty bireý - Ortalyq Azııa aýmaǵyndaǵy barlyq respýblıkalardyń konstıtýtsııalyq qurylymyn buza-jaryp, zaıyrly sıpattaǵy damýdy joıý, onyń ornyna osy aýmaqta ortaǵasyrdaǵy sekildi halıfattyq basqarýlar engizý», - dedi I.Merkel.
Onyń aıtýynsha, búgingi zamandaǵy terrorızm uıymdasqan transshekaralyq qylmyspen tyǵyz birigip otyr. Al ondaı tutasýdyń negizgi sebebi terrorıstik uıymdardyń qarjyǵa táýeldiligine baılanysty bolyp tabylady. «Bunda da eń aldymen dástúrli túrde esirtki bıznesinen, qarý-jaraqtyń zańsyz aınalymynan, adamdardy urlap, saýdalaýdan, qoqan-loqqylyq áreketterden alynǵan qarajattar sol terrorızmdi qarjylandyrýǵa baǵyttalyp jatady», - deıdi I. Merkel.
