Ekstremıstik materıaldar taratqan Rýdnyı turǵyny ustaldy

QOSTANAI. QazAqparat – Rýdnyı qalasynda ekstremıstik ádebıet saqtap, áleýmettik jelide teris aqparat taratyp kelgen 59 jastaǵy turǵyn ustaldy, dep habarlaıdy QazAqparat.

Rýdnyı turǵyny dinı alaýyzdyqty qozdyrýǵa baǵyttalǵan kitapty úıinde saqtaǵan. Bul ádebıetti Aqtóbe sotynyń 2012 jylǵy sheshimimen elimizge ákelýge jáne taratýǵa tyıym salynǵan. Sonymen qatar ol «WhatsApp» messendjeri arqyly ekstremıstik materıaldar taratqan. Dintaný saraptamasynyń qorytyndysyna sáıkes, bul habarlamalardyń dinaralyq alaýyzdyqty qozdyrýǵa baǵyttalǵany anyqtaldy.

Rýdnyı qalasynyń mamandandyrylǵan ákimshilik soty atalǵan azamatty kináli dep tanydy. Jasalǵan quqyq buzýshylyqtar úshin ol 300 myń teńgeden astam aıyppul tóleýi tıis. Sot sheshimi zańdy kúshine endi.

Jalpy 2020 jyly oblystyq polıtsııa departamentiniń ekstremızmge qarsy is-qımyl basqarmasynyń qyzmetkerleri dinı qatynastar salasynda 13 ákimshilik quqyq buzýshylyqty tirkedi. Sot 9 adamǵa 1,9 mln teńgeden (700 AEK) astam aıyppul salyp, ákimshilik jaýapqa tartty.

Oblystyq PD Ekstremızmge qarsy kúres basqarmasynyń bastyǵy Erbol Derbisovtyń aıtýynsha, zańsyz derekterdiń deni ınternet jelisinde jasalǵan.

«Jalǵan dinı uıymdardyń jaqtaýshylary óz materıaldaryn taratý úshin ártúrli messendjerlerdi jıi qoldanady. Dinı materıaldardy taratqany úshin zańnamada ákimshilik jáne qylmystyq jaýapkershilik qarastyrylǵan. «Dinı qyzmet jáne dinı birlestikter týraly» QR Zańynyń 9-babyna sáıkes, dinı ádebıetti, dinı mazmundaǵy ózge de aqparattyq materıaldardy tek ǵıbadat ǵımarattarynda, rýhanı (dinı) bilim berý uıymdarynda, sondaı-aq arnaıy statsıonarlyq úı-jaılarda taratýǵa jol beriletinin eske salamyz», - deıdi E.Derbisov.