Ekstremaldar Kóktóbede 4 000 metr bıiktikten sekirdi
ALMATY. QazAqparat - Tanymal Red Bull Skydive Team áýe komandasynyń atletteri Kóktóbe ústinde vıngsıýtpen sekirdi. Bul - qala ústinde jasalǵan alǵashqy vıngsıýt-sekirý, dep habarlaıdy QazAqparat tilshisi.
Komanda Qazaqstanǵa alǵash ret 2017 jyly kelgen. Sol ýaqytta atletter beıs-djamp jasap, Nur-Sultan qalasynyń aspanynan sekirdi. Almatyǵa kelgen Marko Valtenshpıl, Marko Fıýrst jáne Danıel De La Blanka esimdi ekstremaldardy teńiz deńgeıinen bıikte ornalasqan Kók-Tóbe telemunarasy qyzyqtyrdy.
Joba bir jarym aı daıyndaldy. Atletterdi bizdiń eldiń tabıǵaty baýrap aldy. Qar jamylǵan taý shyńdary sportshylardy beıjaı qaldyrmady. Sondyqtan, Qazaqstanda ekstremaldy sporttyq sekirý kózdelgen.
«Biz Nur-Sultanda birneshe jyl buryn bolǵanbyz, sol kezde áýe sporty úshin eldiń áleýeti joǵary ekenin baıqadyq. Qazaqstanǵa qaıtyp kelý týraly sheshim qabyldadyq. Jobaǵa Almatyny tańdadyq. Biz ushý úshin birneshe jerdi qarastyrǵanbyz. Onyń ishinde Úlken Almaty kóli men telemunara boldy. Kóktóbeni tańdadyq. Árıne, taýlardy qospaǵanda qalanyń eń bıik núktesi osy jer ekenin anyqtadyq. Jobamyzdyń ıdeıasy osylaı paıda boldy. Bári sátti ótti, keremet áser aldyq», - deıdi sportshy Marko Valtenshpıl.
Sheteldik sportshylardyń aspanda qalyqtaýy Almaty qalasynyń barlyq jaýapty qyzmetteriniń kelisimimen 18-20 maýsym aralyǵynda ótti. An-2 ushaǵy atletterdi Býtakovka shatqalynda ornalasqan, 4 000 metrge jýyq bıiktikte belgilengen laqtyrý núktesine jetkizdi. Sportshylardyń vıngsıýtta áýede ushýy shamamen eki mınýtqa solzyldy. Atletter Kóktóbe telemunarasynan 220 metr bıiktikke qondy. Bul biregeı sekirýdi iske asyrýǵa jáne barlyq uıymdastyrý máselelerin sheshýge Visit Almaty kompanııasy, Almaty qalasynyń ákimdigi jáne Almaty qalasynyń týrızm basqarmasy kómektesti.
«Men Qazaqstanda osyndaı bıik taýlar bar ekenin bilmedim. Ásirese, taýdyń arasynan kól kóremin dep oılamadym. Tylsym tabıǵattyń keremetine tańdaı qaqtym. Biz taýda sekirý úshin qanshama múmkindik bar ekenin kórdik. Sondyqtan, osy jerge qaıta oralýdy josparlap otyrmyz», - dedi Marko Fıýrst.
Red Bull Skydive Team áýe akrobattary 2012 jyldan bastap batyl sekirýlerimen jáne ózindik ıdeıalarymen tań qaldyryp keledi. Dál osy komanda 2015 jyly 4000 m bıiktikte ushyp bara jatqan tikushaqtan ındonezııalyq janartaýǵa sekirgen bolatyn. 2016 jyly atletter birneshe júz metr bıiktikte parashıýtke ilingen átkenshekti tepken bolatyn. Komandada aeroakrobatıka boıynsha kóptegen rekordtar bar.
Vıngsıýt «kostıým-qanat» degen maǵyna beredi, ony keıde «ushatyn tıin» dep te ataıdy. Bul - áýe akrobatıkasyna arnalǵan kásibı kostıým.
Avtor: Alma Muqanova
