Eksporttyq strategııada árkimniń naqty mindeti bolýy shart - «Kazakh Invest» ulttyq kompanııasy
ASTANA. QazAqparat - "Kazakh Invest" ulttyq kompanııasynyń basshylyǵy Qazaqstannyń 2025 jylǵa deıingi Eksporttyq strategııasynda árbir memlekettik organ men uıymnyń naqty mindetin kórsetýdi qalaıdy.
Sebebi búginde árkim osy saladaǵy sharalardy ózdiginshe júrgizedi. Al keıbireýlerdiń naqty ustanymy da joq, dep xabarlaıdy QazAqparat tilshisi.
Basqarma tóraǵasynyń orynbasary Meıirjan Maıkenovtyń aıtýynsha, eksporttyq strategııa aıasynda úılestirý jumysyn kúsheıtken durys. Atalǵan qujat arqyly respýblıka boıynsha eksport strategııasyn biryńǵaı júıege keltirý kerek. "Sebebi búginde árkim ózdiginshe jumys jasap keledi. Máselen, aýyl sharýashylyǵy mınıstrliginde óz eksporttyq saıasaty bar. Vedomstvo janynda eksporttyq ortalyq ta bar. Ol aýyl sharýashylyǵy ónimderin eksportqa shyǵarýmen aınalysady. Munaı-gaz sektory óz saıasatyn júrgizip otyr. Qazirgi kezde osy shıkizattyq eksporttyq bolashaǵy qalaı bolady? Osy jaǵy da túsiniksiz. Syrtqy ister mınıstrligi ustanymy qandaı? Atalǵan vedomstvo syrtta qoldaý jasaı ma? Joq pa? "Atameken" ulttyq kásipkerler palatasynyń ustanymy da anyq emes", - dedi Maıkenov búgin eksportty damytýǵa arnalǵan jıynda.
Aıta keteıik , osy otyrysta QR Tuńǵysh Prezıdenti - Elbasy qory janyndaǵy Álemdik ekonomıka jáne saıasat ınstıtýtynyń dırektory Erjan Saltybaev eksplrt kóleminiń azaıyp kele jatqanyn jetkizdi. Otandyq kásipkerler bolsa, jańa naryqtardy ıgerýge qulshynbaıdy.
