Eksporttyq baj alýǵa jatpaıtyn taýarlar eksportyn elektrondy deklaratsııalaýdyń ilki jobasy engizilmek
ASTANA. 6 maýsym. QazAqparat /Aıdar Ospanalıev/ - Qarjy mınıstrliginiń Kedendik baqylaý komıteti ústimizdegi jyldyń sońyna deıin eksporttyq baj alýǵa jatpaıtyn taýarlar eksportyn elektrondy deklaratsııalaýdyń ilki jobasyn engizýdi josparlap otyr.
Bul týraly búgin jýrnalıstermen bolǵan baspasóz-máslıhatynda Kedendik baqylaý komıteti tóraǵasynyń orynbasary Igor Ten málim etti.
«Bul degenińiz, deklaratsııany usynýdy, keden tólemderin tóleýdi jáne basqa da kedendik resimdeýge qajetti qujattardy usynýdy ınternet arqyly júzege asyrý, ıaǵnı «Qorǵas» keden beketindegi júkterdiń deklaratsııalanýyn ashyq baqylaýǵa múmkindik jasalyp otyr», -deıdi tóraǵanyń orynbasary.
Onyń sózine qaraǵanda, «Qorǵas» ótkizý tiregindegi júkterdiń jınalyp qalý jaǵdaıy negizinen Qytaı jaǵyndy bolyp otyr. Buǵan jaqynda ǵana «Atameken» odaǵy» Qazaqstannyń ulttyq ekonomıkalyq palatasy ókilderiniń Qorǵasta uıymdastyrǵan jýrnalıstermen jáne basqa mınıstrlikter men vedomstvo ókilderiniń kezdesýinde kóz jetkizildi.
«Máseleniń týyndaý sebebi, júkter Qytaıda jalǵan qujattar negizinde resimdelgen, ondaǵy málimetter naqty derekterden alshaq jatyr. Al tıisti talaptarǵa saı resimdelgen taýarlar, qazirgi kezde, esh kedergisiz kedendik resimdeýden ótkizilýde»,-dedi I.Ten.
