Eksportty qoldaý: EAEO elderi Eýrazııalyq qaıta saqtandyrý kompanııasyn qurady

ASTANA. QazAqparat – Májilis depýtattary «Eýrazııalyq qaıta saqtandyrý kompanııasyn qurý kelisimin ratıfıkatsııalaý týraly» zań jobasyn maquldady, dep habarlaıdy QazAqparat.

Májilis otyrysynda Saýda jáne ıntegratsııa mınıstriniń mindetin atqarýshy Qaırat Tórebaev 2022 jyly 20 qazanda Erevanda jasalǵan Eýrazııalyq qaıta saqtandyrý kompanııasyn qurý týraly kelisimdi ratıfıkatsııalaýǵa baǵyttalǵan zań jobasyn usyndy.

«Bul kelisimdi jasasý oǵan múshe memleketterdiń eksportty qoldaýdyń birlesken sharalaryn, onyń ishinde saqtandyrýdy kózdeıtin Eýrazııalyq ekonomıkalyq odaq týraly sharttyń 41-tarmaǵyn iske asyrý bolyp sanalady. Atalǵan qujat jańadan qurylatyn Eýrazııalyq qaıta saqtandyrý kompanııasynyń maqsattaryn, mártebesin jáne mindetterin aıqyndaıdy. Kompanııanyń fýnktsııalaryn jáne jarǵylyq kapıtalǵa qatysý úlesterin tóleý tártibin bekitetin jarǵy kelisimniń ajyramas bóligi bolady», - dedi Qaırat Tórebaev Májilis otyrysynda.

Onyń aıtýynsha, kelisimdi qabyldaý EEK-ke múshe memleketterdiń qarjy uıymdaryna ózara halyqaralyq saýda jáne ınvestıtsııalyq qyzmetti qoldaýǵa, birlesken bıznes-jobalardyń úshinshi elderdiń naryqtaryna shyǵýyna belsendi qatysýǵa múmkindik beredi.

«Eýrazııalyq qaıta saqtandyrý kompanııasy eksporttyq-ımporttyq operatsııalardy qoldaıtyn uıymdardy qaıta saqtandyrý qorǵanysymen qamtamasyz etý arqyly syn-qaterlerin tómendetedi. Óz kezeginde Qazaqstan ekonomıkasy EAEO elderimen saýda aınalymyn edáýir ulǵaıtý, olardyń birlesip óndirilgen ónimderin úshinshi elderge ótkizý úshin serpin alady. Kelisimde qoldanystaǵy zańnamanyń barlyq talaptary eskerilgen, osyǵan baılanysty ony ratıfıkatsııalaý Qazaqstan zańdaryna esh ózgeris engizbeıdi», - dedi mınıstrlik ókili.

Buǵan deıin Qaırat Tórebaev Májiliste jańadan qurylatyn eksporttyq-kredıttik agenttik qalaı jumys isteıtinin aıtqan edi.