Eksporttyq júk tasymalynyń kólemi temirjolda 2,2 paıyzǵa artty
ASTANA. KAZINFORM — Bıylǵy jyldyń alǵashqy toqsanynda «Qazaqstan temir joly» arqyly júk tasymaly turaqty ósimmen 64,5 mln tonnaǵa jetti. Іshki jáne eksporttyq tasymaldardyń ósýi, ásirese kómir, astyq pen qara metaldar boıynsha, ekonomıkanyń mańyzdy sektorlaryn qoldap otyr. Bul týraly «Qazaqstan temir joly» UK» AQ baspasóz qyzmeti málim etti.
Bıylǵy jyldyń birinshi toqsanynda «Qazaqstan temir joly» UK» AQ jelisi boıynsha 64,5 mln tonna júk tasymaldandy. Byltyrǵy jyldyń sáıkes kezeńimen salystyrǵanda bul kórsetkish 360 myń tonnaǵa artyq. Іshki tasymaldar 40,8 mln tonnany, eksport 23,7 mln tonnany (+2,2%) qurady.
Áleýmettik mańyzy bar júkterdi tasymaldaý máselesi erekshe baqylaýda.
— Bıylǵy jyldyń qańtar-naýryz aılary aralyǵynda 27,4 mln tonna kómir (+3%) tasymaldansa, onyń 19,8 mln tonnasy ishki naryqqa (+4%) baǵyttaldy. Astyq tıeý 15,4% ósip, 4,1 mln tonnany qurady, onyń ishinde eksport — 3,3 mln tonna (+17,5%). Eksportqa shyǵatyn un tartý ónimderin tasymaldaý kórsetkishi 6,2%, ıaǵnı 570 myń tonnaǵa deıin ulǵaıdy, — delingen habarlamada.
Ósim tasymaldanatyn júktiń basqa da túrleri boıynsha tirkeldi. Máselen, qara metaldar — +18% (1,3 mln tonna), temir jáne marganets kenderi — +14% (2,7 mln tonna), tyńaıtqyshtar — +3% (1,2 mln tonna) tasymaldandy.
«Qazaqstan temir joly» UK» AQ jeliniń turaqty jumysyn jáne eksporttyq tasymaldardyń ósýin qamtamasyz etedi.
Buǵan deıin astyq pen un eksporty 8,9 mln tonnaǵa jetkenin jazdyq.
