Eksporttyq tasymal 89 mıllıon tonnadan asty: QTJ basshysy Prezıdentke esep berdi

ASTANA. KAZINFORM - Memleket basshysy «Qazaqstan temir joly» UK» AQ basqarma tóraǵasy Talǵat Aldybergenovti qabyldady, dep habarlaıdy Aqordanyń baspasóz qyzmeti.

Qasym-Jomart Toqaevqa kompanııanyń ótken jyly atqarǵan qyzmetiniń nátıjeleri jóninde málimet berilip, aldaǵy kezeńge arnalǵan jospary tanystyryldy.

Talǵat Aldybergenov tarıftik júk aınalymy 10 paıyzǵa artyp, 289 mıllıard tonna-shaqyrymdy quraǵanyn aıtty. Tasymal kólemi 5,5 paıyzǵa ulǵaıyp, 320 mıllıon tonnaǵa deıin jetken. Eksporttyq tasymal 89 mıllıon tonnadan asty. Júk tranzıti 20 paıyzdan astam ósip, 33 mıllıon tonna boldy.

Prezıdentke byltyr paıdalanýǵa berilgen Dostyq – Moıynty temir jolynyń ekinshi jelisi arqyly 6 mıllıon tonna nemese 100 myń vagonnan asa júk jetkizilgeni baıandaldy. Almaty beketin aınalyp ótetin temir joldaǵy tehnıkalyq qozǵalysqa ruqsat etildi.

Temirjol ınfraqurylymdaryn tartý jáne jańǵyrtý jumystary jalǵasyp jatyr. Jobalardyń jalpy uzyndyǵy 3900 shaqyrymdy quraıdy.

Qasym-Jomart Toqaevqa kompanııa qyzmetinde qaýipsizdikti, tıimdilik pen ashyqtyqty qamtamasyz etý úshin jasandy ıntellektini engizý arqyly tsıfrlyq jobalar júzege asyrylyp jatqany aıtyldy.

Tálimgerlik ınstıtýty jolǵa qoıylyp, jastar kadrlyq rezervi jasaqtalǵan.

Prezıdent áleýmettik máselelerdi sheshýdiń mańyzyn atap ótip, temirjolshylarǵa arnalǵan qoljetimdi turǵyn úı salý bastamasyn quptady.

Memleket basshysy «Qazaqstan temir joly» UK» aktsıonerlik qoǵamyn transformatsııalaýdy jalǵastyrý, iri sheteldik kompanııalarmen yntymaqtastyqty nyǵaıtý, tsıfrlyq sheshimderdi engizý, mýltımodaldyq logıstıkany damytý maqsatynda ınfraqurylymdardy keńeıtý jóninde tapsyrma berdi.

Osyǵan deıin ótken jyly temirjol kóligimen júkterdi tasymaldaý kólemi 5,5 paıyzǵa artqany týraly jazdyq.