Eksporttyq shekteý sırek jer elementteriniń baǵasyn sharyqtatyp jiberdi

ASTANA. KAZINFORM – AQSh-pen tarıftik teketireske túsken Qytaı sırek jer elementterine eksporttyq shekteý engizgennen keıin, bul mıneraldardyń baǵasy birneshe apta ishinde úsh esege deıin ósip, tarıhı rekord ornatty. Bul týraly Lianhe Zaobao basylymy habarlady. 

Nikkei Asian Review usynǵan derekterge súıengen sıngapýrlyq basylym, elektromobılder men jel týrbınalarynyń óndirisi úshin aıryqsha mańyzy bar sırek jer elementteriniń baǵasy jedel qymbattap kele jatqanyn aıtady. Aıtalyq, ónimdiligi joǵary magnıtter jasaýda qoldanylatyn dısprozıı men terbııdiń baǵasy ótken bir aıdyń ishinde úsh esege sharyqtap ketken. 

AQSh-tyń «ózara tarıfter» saıasatyna jaýap retinde Qytaı 4 sáýirden bastap sırek jer elementteriniń jeti túrine eksporttyq shekteý engizdi. Sarapshylardyń pikirinshe, shekteýler engizilgennen keıin osy sırek jer elementteriniń eksporty kúrt toqyraǵan. 

Basylym brıtandyq Argus Media agenttiginiń málimetin keltirgen. Belgili bolǵandaı, 1 mamyrdaǵy jaǵdaıǵa sáıkes, Eýropada dısprozııdiń baǵasy kelisine 850 AQSh dollaryna jetken. Bul eksporttyq shekteýler engizilgen sáýir aıynyń basyndaǵy deńgeıden úsh esege joǵary. Al terbııdiń baǵasy kelisine 3 000 AQSh dollaryna deıin kóterilgen. 

Basylymnyń jazýynsha, sırek jer elementiniń osy eki túriniń baǵasy tıisti derekter tirkele bastaǵan 2015 jyldyń mamyr aıynan bergi eń joǵary aılyq ósimdi kórsetip, tarıhı deńgeıge jetken.

Sırek jer elementteri jeńil jáne ortasha aýyr bolyp bólinedi. Bul joly Qytaı bıligi shekteý engizgen jeti túrli sırek jer elementi óndiris kólemi óte az ortasha aýyr topqa jatady. Bulardyń óndirisi negizinen Qytaıǵa táýeldi, sondyqtan Qytaı bul salada úlken basymdyqqa ıe.

Japonııanyń Mizuho Bank kompanııasy óndiristik zertteýler departamentiniń aǵa taldaýshysy Takahıro Satonyń aıtýynsha, eksporttyq shekteý engizilgen sırek jer elementterin basqa elderde balamaly jolmen óndirý óte qıynǵa soǵady.

Sırek jer elementteri, tipti óte az mólsherde qosylsa da, materıaldardyń qasıetin aıtarlyqtaı jaqsarta alady. Sondyqtan elektrlik kólik, jel generatory, aeroǵarysh sııaqty joǵary tehnologııalyq óndiris salalarynda keńinen qoldanylady, olar «ónerkásip dárýmenderi» degen atqa ıe.

Basylymnyń jazýynsha, sırek jer elementteri baǵasynyń kúrt ósýi elektromobıl sııaqty ónimderde qoldanylatyn elektrlik qozǵaltqyshtardyń qunyn aıtarlyqtaı ósirýge tıis. Bul týrasynda Tokıo ýnıversıtetiniń professory Torý Okabe jetkizilim tizbegindegi úzilis uzaqqa sozyla berse, elektromobıl óndirisi toqyrap qalýy múmkin dep eskertedi. 

Buǵan deıin AQSh Qytaıdan quny 800 dollardan az shaǵyn sálemdemelerdiń baj salyǵynsyz ákelinýin toqtatqany týraly jazǵan edik.