Eksporttaýshylarǵa 1 trln teńgeden astam qarajat qaıtaryldy – Tákıev

ASTANA. KAZINFORM — Bıyl 11 aıda áleýmettik qoldaýǵa 8,3 trln teńge baǵyttaldy. Bul týraly búgin Úkimet otyrysynda Qarjy mınıstri Mádı Tákıev aıtty.

- Salyqtyq jáne kedendik ákimshilendirý sapasyn arttyrý esebinen bıýdjetke 660 mlrd teńge túsim qamtamasyz etildi. Eksporttaýshylarǵa 1 trln teńgeden astam qarajat qaıtaryldy. Bul sharalar bıýdjettiń kiris bazasyn kúsheıtip, bıznestiń tólem qabilettiligine qoldaý boldy. Memlekettik bıýdjet shyǵystary 95, onyń ishinde respýblıkalyq bıýdjet 96, jergilikti bıýdjet 95 paıyz atqaryldy, - dedi mınıstr.

Onyń dereginshe,negizgi basymdyqtar saqtala otyryp, bıýdjettiń shyǵystary kelesi salalarǵa baǵyttaldy:

– áleýmettik qoldaýǵa 8,3 trln teńge;
– óńirlerdi qoldaýǵa – 6,9 trln teńge;
– naqty sektorǵa – 1,8 trln teńge .

- Jalpy alǵanda «Jaıly mektep», «Aýyl – el besigi», sý jáne jylýmen jabdyqtaý, gaz jáne kólik ınfraqurylymy, turǵyn úı jáne jeke turǵyn úı qurylysy sııaqty negizgi baǵyttar boıynsha 870 joba iske asyrylyp jatyr. Kiristerdiń aǵymdaǵy serpini men shyǵystardy basqarýdaǵy turaqty saıası qadam, tapshylyqty bekitilgen kovenanttar sheginde baqylaýda ustaýǵa múmkindik beredi, - dedi Mádı Tákıev.

Buǵan deıin 11 aıda memlekettik bıýdjet kirisi 21,9 trln teńgege jetkenin jazǵan edik.