Eksporttaýshylar úshin QQS qaıtarý protsesi jeńildetiledi

ASTANA. KAZINFORM — Qazaqstan Respýblıkasynyń jańa Salyq kodeksinde 2026 jyldan bastap qosylǵan qun salyǵyn (QQS) qaıtarýdy jeńildetý kózdelgen, dep habarlaıdy Memlekettik kirister komıtetiniń baspasóz qyzmeti.

— Qoldanystaǵy normalarǵa sáıkes QQS-ty qaıtarýdyń jeńildetilgen tártibi salyq tóleýshilerdiń jekelegen sanattaryna — bekitilgen tizbelerge engizilgen iri kásiporyndarǵa, óndirýshiler men eksporttaýshylarǵa qatysty ǵana qoldanylady. Qazirgi ýaqytta mundaı kompanııalardyń sany shamamen 40-50, — dep túsindirdi vedomstvo.

Jańa jyldan bastap barlyq eksporttaýshy QQS-ty ońaılatylǵan qaıtarý quqyǵyn alady, olardyń sany 1000-nan asady.

QQS-ty ońaılatylǵan tártippen qaıtarý tekserýsiz 15 jumys kúni ishinde júrgiziledi. Bul úshin myna eki shart oryndalýy kerek:

• Qaıtarý týraly ótinish bergen kúni salyq tóleýshiniń oryndamaǵan habarlamalary bolmaýy tıis;

• Sońǵy 12 aıda júrgizilgen salyq tekserýinde qaıtarýǵa jatatyny rastalǵan QQS somasy bolýy qajet.

Qaıtarý somasyn aıqyndaý salyqtyq táýekelderdi basqarý júıesin paıdalana otyryp júzege asyrylady, bul rette negizgi baǵdar aldyńǵy salyqtyq tekserýlerdiń nátıjeleri bolady.

— Sondaı-aq QQS qaıtarý boıynsha tekserý tártibine ózgerister engiziledi. Sonymen, eger buryn «Pıramıda» esebi QQS qaıtarýdan bas tartýǵa ákep soqtyrǵan barlyq jetkizý tizbegindegi buzýshylyqtardy anyqtaý úshin paıdalanylsa, onda 2026 jyldan bastap bul esep táýekeldi aımaqtardy anyqtaý quraly retinde qoldanylatyn bolady. Qaıtarý kezinde kúmándi jaǵdaılar bolsa, qosymsha tekserý taǵaıyndalady. Jetkizýshilerde buzýshylyq tabylsa, debettik saldo somalary qaıtarylmaıdy, — delingen habarlamada.

Komıtettiń baspasóz qyzmeti atap ótkendeı, qabyldanǵan ózgerister salyq rásimderiniń ashyqtyǵyn arttyrýǵa, QQS qaıtarýdy jedeldetýge jáne bızneske ákimshilik júktemeni azaıtýǵa baǵyttalǵan.

Budan buryn 2026 jyldan bastap medıtsınalyq qyzmetter men dári-dármekter QQS-tan bosatylatynyn jazǵan edik.