Eksportqa baǵyttalǵan gaz kólemi tolyq oryndaldy – Nurlan Noǵaev

NUR-SULTAN. QazAqparat – 13,9 mlrd tekshe metr kóleminde gaz óndirilip, jospar 100 paıyzǵa oryndaldy.

Bul týraly Úkimet otyrysynda bıylǵy qańtar-naýryz aılarynyń qorytyndysy boıynsha otyn-energetıka keshenin talqylaý kezinde QR Energetıka mınıstri Nurlan Noǵaev málim etti, dep habarlaıdy QazAqparat tilshisi.

«Kórsetilgen kezeńde 13,9 mlrd tekshe metr kóleminde gaz óndirildi, jospar 100 paıyzǵa oryndaldy. Taýarlyq gazdy ishki tutyný kólemi 6,6 mlrd tekshe metrge jetti, osy kórsetkish bıylǵy jylǵy qańtar-naýryz aılarynyń josparyna 111,3 paıyzǵa oryndaldy», - dedi mınıstr.

Onyń aıtýynsha, suıytylǵan munaı gazyn óndirý kólemi 817 myń tonnany qurady, bul esepti kezeńniń josparymen salystyrǵanda 100% teń.

«Eksportqa shyǵarylǵan gaz kólemi 2,1 mlrd tekshe metrdi qurady, josparymen 105,4 paıyzǵa oryndaldy», - dedi Nurlan Noǵaev.