Eksport, energetıka, áriptestik: Qazaqstan men Ázerbaıjan seriktestigi artyp keledi

ASTANA. KAZINFORM — Qazaqstan men Ázerbaıjan arasyndaǵy ekijaqty taýar aınalymynyń oń serpinine qaramastan, birqatar salada iske aspaǵan zor áleýet saqtalyp otyr.

Bul týraly ADA ýnıversıteti janyndaǵy Damý jáne dıplomatııa ınstıtýty (IDD) men «Astana» halyqaralyq qarjy ortalyǵy (AHQO) birlesip ázirlegen «Qazaqstan men Ázerbaıjan arasyndaǵy ekonomıkalyq yntymaqtastyqty nyǵaıtý» atty baıandamada kórsetilgen.

— Qazaqstan men Ázerbaıjan arasyndaǵy keńeıip kele jatqan ekonomıkalyq áriptestik strategııalyq qarym-qatynastar men tereńdep kele jatqan odaqtastyq baılanystarǵa negizdelgen. Bul baǵyt eki el kóshbasshylarymen tolyq qoldaý taýyp otyr, — delingen qujatta.

Sarapshylardyń aıtýynsha, qos memleket Jibek jolynyń negizgi toraptyq elderi retinde óńirlik jáne transóńirlik baılanysty nyǵaıtýǵa baǵyttalyp, kelisilgen geoekonomıkalyq strategııa júrgizip jatyr. 

Sonymen qatar baıandamada ekijaqty taýar aınalymynyń oń serpinine qaramastan, kómirsýtek jáne jańǵyrtylǵan energetıka, kólik jáne logıstıka, qarjy qyzmetteri, telekommýnıkatsııalar men agrarlyq azyq-túlik saýdasy sııaqty salalarda áli de aıtarlyqtaı iske aspaǵan áleýet saqtalǵany kórsetilgen.

Sarapshylar ınfraqurylymǵa ınvestıtsııa salýdy jalǵastyrýdy usynady.

— Orta dálizdi damytý jáne Kaspıı teńizi arqyly sýasty talshyqty-optıkalyq baılanys jelisin tartý Qazaqstan men Ázerbaıjannyń Eýropa men Azııa arasyndaǵy negizgi tranzıttik hab retinde odan ári nyǵaıtady, — delingen baıandamada.

Sondaı-aq sarapshylar «jasyl energetıka» men aýyl sharýashylyǵy salasyndaǵy saýdany keńeıtýdi usynady.

— Qazaqstan munaıyn Ázerbaıjan aýmaǵy arqyly eksporttaý kólemin arttyrý, jańǵyrtylǵan elektr energııasyn tasymaldaý jobalaryn iske qosý, aýyl sharýashylyǵy ónimderimen saýdanyń tıimdiligin arttyrý men qarjylyq ózara árekettestikti tereńdetý uzaq merzimdi perspektıvada ornyqty ekonomıkalyq model qalyptastyrýǵa yqpal etedi, — deıdi mamandar.

Buǵan deıin, Túrki memleketterdiń Parlamenttik Assambleıasynyń plenarlyq otyrysynda Ázerbaıjan Respýblıkasy Mıllı Medjlısiniń tóraıymy Sagıba Gafarova TúrkPA-ǵa múshe elderdi energııa kózderiniń tasymaldaý alasynda birlesip áreket etýge shaqyrǵanyn jazǵanbyz.

Sondaı-aq bıyl Qazaqstan men Ázerbaıjan arasyndaǵy strategııalyq áriptestik pen odaqtastyq qatynastar týraly shartqa 20 jyl tolǵanyn habarlaǵan edik.