EKSPO ótetin jyly Pavlodar oblysynda shybyn-shirkeı bolmaıdy
ASTANA. QazAqparat - Kelesi jyly Pavlodar oblysynda shybyn-shirkeımen kúreske bólinetin qarajat kólemi tórt ese óspek. Bul týraly jýrnalıstermen beıresmı kezdesý barysynda oblys ákimi Bolat Baqaýov málim etti, dep habarlaıdy pavlodarnews.kz.
- Bıyl shybyn-shirkeılerge qarsy kúreske 143 mıllıon teńge qarastyrylsa, 2017 jyly 602 mıllıon teńge bólýdi josparlap otyrmyz, - dedi óńir basshysy. - Osylaısha, "EKSPO" kórmesi ótetin jyly óńirde jándikterdiń bul túri kúrt azaımaq. Atalmysh jumyspen aınalysatyn merdigerlerdi aldyn ala belgileıtin bolamyz. Negizi, bul konkýrsty qarasha-jeltoqsan aılarynda ótse dep oıladym, biraq merzimi biraz shegerildi. Zerthanalar da erterek oblystaǵy jaǵdaı boıynsha eskertý jasaıdy. Bizdiń óńir úshin bul óte mańyzdy. Pavlodar oblysyna týrısterdi tartý kerek jáne osy máselede esh nárse kedergi bolmaý kerek».
Esterińizge sala ketsek, bıyl Ertis ózeniniń tasýy sońǵy 15 jylda rekordtyq kórsetkishke jetken bolatyn. Sonyń saldarynan pavlodarlyqtar eki márte shybyn-shirkeıdiń astynda qaldy. Kóktemde ózenge 19 tonna «Baktıtsıt» bıologııalyq dári-dármegi quıyldy. Alaıda, bul dáriniń oblysta shybyn-shirkeıdiń sanyn azaıtýǵa septigi bolmady.
