EKSPO kórmesi barysynda «Meniń Qazaqstanym» atty Sh. Qaldaıaqov ánderiniń halyqaralyq festıvali ótedi

ASTANA. QazAqparat - Shámshi Qaldaıaqov - aty alty alashqa áıgili, qazaq halqynyń ulttyq maqtanyshyna aınalǵan uly kompozıtor. Ol - búkil el moıyndaǵan, jalpy halyqtyń sheksiz súıispenshiligine bólengen, qalyń jurttyń qaınaǵan ortasynan shyqqan dara daryn, týma talant, aty kózi tiri kezdiń ózinde ańyz bolyp ketken biregeı óner ıesi.

Qazaqtyń arasynda «Shámshi, Shámshiniń áni» dese, ishken asyn jerge qoımaıtyn jan joq. Kez-kelgen adamnyń júregin tebirentetin - aıaýly ana, ardaqty áke, móldir sezim, shynaıy mahabbat - osynyń bárin Shámshi ánderinen tabýǵa bolady. Onyń shyǵarmalarynyń taqyryptyq, mazmuny keń. Shámshi shyǵarmalarynyń qaısysyn almaıyq, olardyń basty taqyryby - elge, jerge, Otanǵa degen súıispenshilik.

Sh. Qaldaıaqovtyń ánderi qulaqqa jaǵymdy, júrekke jyly qabyldanady. «Aq erke - Aq jaıyq», «Arys jaǵasynda», «Syr sulýy», «Jarqyraıdy Jezqazǵan», «Qarqaraly», «Fosforly Jambyl», «Taldyqorǵan - ánim meniń», «Teriskeı», «Moıynqumda», «Otyrardaǵy toı», «Ómir - ózen» t. b. óleńderinen keń baıtaq jerimizge, elimizge degen ystyq yqylas, meıirim, súıispenshilik sezimderine toly. Al «Baqyt qushaǵynda», «Bárinen de sen sulý» sııaqty ánderi jastyq jiger men shattyqqa toly. 

«Shámil-aý! 

Shámshi qaıda?  Shámshi qaıda? 

Shámshige aıt, 

Taǵy da bir tańdandyrsyn, 

Jyndandyrsyn júrekti, jandandyrsyn! 

Máńgi ólmes Mahabbatym aıta júrer, 

Máńilik ólmeıtuǵyn án qaldyrsyn!»

Aqıyq Muqaǵalı Maqataev Shámshige osylaı dep óleń órgen. Shámshi artyna máńgilik ólmeıtuǵyn qazyna qaldyrdy da...

Sazgerdiń marsh ekpindi, maǵyna - mazmuny tereń «Meniń Qazaqstanym» áni - búgingi kúni táýelsiz Qazaqstan memleketiniń ánurany.

Sh. Qaldaıaqovtyń kóptegen ánderi R. Baǵlanova, R. Abdýllın, B. Tólegenova, R. Musabaev, Z. Qoıshybaeva t. b. ánshilerdiń repertýarynan berik oryn aldy.

Shámshi Qaldaıaqovtyń shyǵarmashylyq ereksheligi - qazaqstandyq estradalyq ánder áýenin ulttyq naqyshpen baılanystyra bilýinde. Onyń kóptegen shákirtteri ózderiniń ulaǵatty ustazynyń dástúrin kúni búginge deıin jalǵastyrýda.  Sh. Qaldaıaqov ánderiniń halyqaralyq festıvali osyǵan dálel ispettes.

Qazaqtyń án ónerin damytý, Shámshi Qaldaıaqovtyń mol murasyn halyq arasynda oryndap júrgen daryndy jastardyń shyǵarmashylyǵyna qoldaý kórsetý, qazaq estradasynyń mańdaı aldy sheberleriniń ónerin keıingi jas býynǵa úlgi etý, sondaı-aq, qazaqtyń daryndy kompozıtorynyń shyǵarmalaryn ulyqtap, buqara halyqqa nasıhattaý maqsatynda elimizde «EKSPO-2017» halyqaralyq mamandandyrylǵan kórmesine oraı,  «Meniń Qazaqstanym» atty Sh. Qaldaıaqov ánderiniń halyqaralyq festıvali uıymdastyrylyp otyr.

Qazaq án ónerin damytý jáne Sh. Qaldaıaqovtyń ánderin oryndap júrgen jas talanttarǵa qoldaý kórsetý maqsatynda ótetin konkýrs eki kezeńnen turady. Barlyq kezeńder ashyq túrde ótedi. Qatysýshylar Sh. Qaldaıaqovtyń ánderin oryndaıdy. Jas talanttardyń, erekshe oryndaýshylardyń elge ashylýy jáne aıshyqty gala-kontsert bolady dep kútilýde.

Jospar boıynsha, «Meniń Qazaqstanym» atty Sh. Qaldaıaqov ánderiniń halyqaralyq festıvali tamyz aıynyń aıaǵynda qatarynan tórt kún boıy bolady.

Qazaq Ulttyq óner ýnıversıteniniń «Organ zalynda» 28-29 tamyz kúni alǵashqy kezeńi ótedi. Ekinshi kezeń «Qazaqstan» ortalyq kontsert zalynda 30 tamyz kúni jalǵasady.

Al jas talanttar men tanymal juldyzdardyń qatysýymen ótetin aıshyqty gala-kontsert 31 tamyz, ıaǵnı Qazaqstan Respýblıkasynyń Konstıtýtsııasy kúni, barlyq qonaqtar úshin qazaqtyń darhan minezin pash etetin «Etnoaýyl» ulttyq mádenı kesheninde ótkiziledi.