EKSPO-ǵa baılanysty Astanadan qańǵybastar «kóshirilip» jatqan joq - jergilikti polıtsııa

ASTANA. QazAqparat - EKSPO kórmesi qarsańynda Astanadaǵy turaqty mekenjaıy joq adamdar men qaıyrshylyqpen kún kóretinder basqa qalaǵa kóshirilip jatqandyǵy týraly aqparat shyndyqqa janaspaıdy.

Bul týraly Astana ákimdiginiń medıa ortalyǵynan habarlady..

Keshe áleýmettik jelide «Astanany qańǵybastardan tazartyp jatyr», «Jarty saǵat buryn Petropavlǵa Astanadan 150 qaıyrshyny ákelip túsirdi» degen aqparat tarap, ınternetti qoldanýshylar tarapynan qyzý talqylanǵan bolatyn.

Astana qalalyq Іshki ister departamentiniń málimetinshe, bul aqparat shyndyqqa janaspaıdy.

«Búginde 300-den astam azamat elordadaǵy qabyldaý-taratý ortalyǵyna jetkizildi. Sondaı-aq turǵylyqty mekenjaıy anyqtalmaǵan 300-den asa azamat áleýmettik ortalyqqa ornalastyryldy. Kóshi-qon zańnamasyn buzǵan shetel azamattaryn elderine qaıtarý isi qolǵa alyndy. Budan bólek, turaqty mekenjaıy joq ózge qalalar turǵyndarynyń týystaryn izdep-tabý jumystary júrgizilýde. Sondaı-aq azamattardyń aryz-shaǵymdary úshin «shuǵyl jeli» iske qosyldy», -  dedi ІІD Jergilikti polıtsııa qyzmeti basshysynyń orynbasary Gosman Jakın.