EKSPO elshilerdiń jumysyn jandandyra tústi - Mıxaıl Bocharnıkov

ASTANA. QazAqparat - Búgin Memleket basshysy Nursultan Nazarbaev Aqordada dıplomatııalyq mıssııalar men xalyqaralyq uıymdardyń ókilderimen kezdesip, syrtqy jáne ishki saıasattyń negizgi basymdyqtary týraly aıtyp berdi. Al Reseı Federatsııasynyń Qazaqstandaǵy Tótenshe jáne ókiletti elshisi Mıxaıl Bocharnıkov sheteldiń barlyq dıplomattary atynan sóz sóıledi, dep xabarlaıdy QazAqparat tilshisi.

«Ashyǵyn aıtý kerek, EKSPO-2017 kórmesi dıplomatııalyq korpýstyń ómirin jandandyra tústi. Buǵan deıin Astanadaǵy elshilerdiń ýaqyty ondaı tyǵyz bolǵan emes. Biz kúnde birneshe delegatsııamen kezdesemiz. Kórme qatysýshylarynyń ulttyq kúnderi ótedi. Odan keıin saltanatty qabyldaýlar jáne taǵysyn taǵy. Ýaqyt jetpeıdi», - dedi Bocharnıkov.

Osy oraıda reseılik elshi kúndelikti sharalardy uıymdastyrýǵa atsalysatyn syrtqy ister mınıstrligi, dıplomatııalyq korpýsqa qyzmet kórsetý basqaramasy men Astana ákimdigine barlyq dıplomattardyń atynan alǵys bildirdi.

«Bizge Qazaqstan oblystarynyń ınvestıtsııalyq-ekonomıkalyq múmkindikterin tanystyryp otyrady. Syrtqy ister mınıstrligi uıymdastyrǵan jańajyldyq bal da elshiler arasyndaǵy baılanystardy nyǵaıtýǵa óz septigin tıgizdi. Dál osy shara dástúrge aınalady dep senimiz», - dedi Bocharnıkov.

Aıta keteıik, búgin QR Prezıdenti Nursultan Nazarbaev elimizde tirkelgen dıplomatııalyq mıssııalar men xalyqaralyq uıymdardyń ókilderimen kezdesti. Memleket basshysy «EAEO-ShYU-EO» yntymaqtastyǵyndamytý qajettigin jetkizdi.

Sondaı-aq, Prezıdent MAGATE-nyń ýran banki ashylatyn kúndi jarııalady.

Prezıdent Qatar máselesin sheshýge alań usynýǵa daıar ekenimizdi de jetkizdi.

«Osy oraıda aıta ketken jón, bitimgerlik mıssııa bizdiń syrtqy saıasatymyzdyń basty baǵyty bolyp qala bermek. Qazaqstan beıbit kelissózderdi júrgizýge jaǵdaı jasaıtyn memleket boldy, bolady da. Bylaısha aıtqanda,«ádil broker» qyzmetin jalǵastyra beredi», - dep atap kórsetti Prezıdent.