EKSPO-daǵy meıramhanalar qazir jumys istep turǵan joq
ASTANA. QazAqparat - «HoReCa» qonaq úı-meıramhana bıznesi qaýymdastyǵynyń prezıdenti Igor Kopaılov EKSPO aýmaǵynda ornalasqan meıramhanalardyń aldaǵy jaıy týraly aıtyp berdi, dep habarlaıdy QazAqparat tilshisi.
«Qazir olardyń jumysy toqtap tur, azdap óz aýdıtorııasyn joǵaltyp aldy. Árıne, bıznes ıeleri biraz shyǵynǵa ushyrady, biraq olar maýsymdyq bıznes ekenin, túrli qıyndyqtar bolatynyn aldyn ala bildi», - dep jaýap berdi «HoReCa» qonaq úı-meıramhana bıznesi qaýymdastyǵynyń prezıdenti Igor Kopaılov Astanada ótken baspasóz máslıhatynda jýrnalıster suraǵyna jaýap berip.
Qaýymdastyq basshysynyń aıtýynsha, EKSPO aýmaǵynda ornalasqan meıramhanalar men qonaq úılerdiń keleshegi bar.
«Kez kelgen jaǵdaıda, bul mekemelerdiń keleshegi bar. EKSPO aýmaǵyndaǵy qurylys jumystary aıaqtalǵan soń, keshen jańa sıpatta qaıta ashylady. Túrli ortalyqtar ashylady, turaqty negizde kórmeler ótip turady. Sondyqtan, EKSPO aýmaǵynda ashylǵan mekemeler óz jumystaryn qaıta jalǵastyrady», - dep óz sózin túıindedi I.Kopaılov.
