EKSPO aýmaǵynda «Robopolıs» pılottyq jobasy iske qosylady
ASTANA. QazAqparat - Qazaqstandyq robototehnıkany damytýǵa qoldaý kórsetý aıasynda Astanadaǵy EKSPO aýmaǵynda «Robopolıs» pılottyq jobasy iske qosylady, dep habarlaıdy «QazAqparat» «Zerde» holdınginiń Feısbýktegi habarlamasyna silteme jasap.
«Robopolıs» jobasy robototehnıka deńgeıin damytýǵa, kúndelikti ómirde robottardy paıdalanýǵa jáne ınnovatsııalyq jetistikterge arnalǵan ǵylymı-tehnıkalyq bazany damytýǵa baǵyttalǵan»,-dep jazylǵan habarlamada.
Jobanyń maqsaty - jas urpaqtyń ıntellektýaldy áleýetin damytý, jastar arasynda ınjenerlik mamandyqtardy nasıhattaý, Qazaqstanda robottyq tehnıkany damytýdy yntalandyrý, jeke kompanııalardy yntymaqtastyqqa tartý.
Atalǵan joba aıasynda «Zerde» holdıngi robototehnıka salasy boıynsha baıqaý jarııalaıtynyn habarlaıdy.
Baıqaý qorytyndysy boıynsha úzdik jobalar Astana Hub Halyqaralyq IT-startap tehnoparkiniń ashylýynda kórsetilmek. Jeńimpazdar robototehnıka salasyndaǵy jetistikterin odan ári damytý maqsatynda qarjylyq syılyqtar men granttarǵa qol jetkizedi.
