«EKSPO-2017» kórmesiniń ıdeıalaryn bilim salasyna engizetin jumys toby quryldy - Erlan Saǵadıev
«Mınıstrlik Astanadaǵy «EKSPO-2017» kórmesi ıdeıalaryn, tehnologııalaryn bilim jáne ǵylym salasyna engizý úshin jumys tobyn qurdy. Jańartylǵan jel, kún, geotermaldy energetıka, gıdroenergetıka men bıoenergetıka, sondaı-aq ıadrolyq energetıka salasyndaǵy damyǵan elderdiń kórme ekspozıtsııalary zertteldi. Qazaqstan úshin paıdaly ıdeıalar men jobalardy úsh topqa bólýge bolady. Birinshiden, ǵylymı ıdeıalar men kommertsııalyq qoljetimdi ınnovatsııalar, ekinshiden - tehnologııa, al úshinshi topta bilim berý tehnologııasy men ádistemesi qamtylǵan»,-dedi E. Saǵadıev.
Onyń atap ótýinshe, kórmege 55 ýnıversıtet pen ǵylymı ortalyq ókilderi bardy. EKSPO-ǵa qatysqan eldermen 100-den astam kezdesý ótti. 9 memorandýmǵa qol qoıyldy, ýnıversıtetter 20-dan astam ekijaqty yntymaqtastyqtyń kelisimderine qol jetkizdi».
Mınıstrdiń sózine qaraǵanda, Ál-Farabı atyndaǵy Qazaq ulttyq ýnıversıteti koreı áriptesterimen jańartylǵan energııa kózderi boıynsha jańa tehnologııalardy daıyndaý aıasynda birlesken ǵylymı zertteýler júrgizý týraly, ekinshiden, Latvııa ýnıversıtetterimen jańa perspektıvaly materıaldardy zertteý týraly, sondaı-aq Majarstan, Chehııa, Polsha elderindegi áriptesterimen elektr energııasyn óndirý salasyndaǵy tehnologııalyq transferti boıynsha kelisimder jasady.
Budan bólek L.N. Gýmılev atyndaǵy Eýrazııa ulttyq ýnıversıteti Frantsııa, AQSh ókilderimen termoelektrık materıaldar negizinde quraldardy paıdalaný turǵysynda birlesken zertteý týraly kelisimge qol qoıdy.
Sonymen qatar elimizdiń óńirlerindegi ózge joǵary oqý oryndary da EKSPO aıasynda sheteldik áriptesterimen birlesken zertteýler men jobalar boıynsha ýaǵdalasty.
«Jumystar aıaqtalǵan joq. Ýnıversıtetter bilim jáne ǵylym salasynda jańa jobalarǵa alyp keletin kelissózderdi jalǵastyrýda. Mınıstrlik bul jumystardy qadaǵalaýda ustaıdy»,-dedi Saǵadıev.
