EKSPO-2017» kórmesine qaraı elordada qoǵamdyq bıodárethanalar jetpeýi múmkin
ASTANA. QazAqparat - Astana qalasy Tutynýshylardyń quqyqtaryn qorǵaý departamentiniń ókilderi «EKSPO-2017» kórmesine qaraı elordada qoǵamdyq dárethanalar (bıodárethana) jetpeýi múmkin ekenin alǵa tartýda.
Bul týraly búgin Astana tutynýshylarynyń quqyqtaryn qorǵaý máseleleri boıynsha úılestirý komıssııasynyń otyrysynda atalǵan departament basshysynyń orynbasary Fedor Peev málim etti.
«Shyn máninde «EKSPO» kórmesi ótkiziletin jerlerde qoǵamdyq dárethanalar jetkilikti bola ma degen saýal alańdatady. Ózderińiz bilesizder, qalamyzda osy másele boıynsha kemshin tustar bar»,-dedi F. Peev.
Onyń sózine qaraǵanda, búginde qalada 200-ge jýyq bıodárethana bar. Alaıda, olar qalaǵa kóptep qonaqtar kele bastaǵan kezde jetkiliksiz bolady.
F. Peevtiń paıymynsha, qazirden bastap ákimdikpen birlese qosymsha bıodárethanalardy satyp alý boıynsha jumystardy atqarý qajet.
Esterińizge sala keteıik, «EKSPO» kórmesi Astanada 2017 jyldyń maýsymynda bastalyp, 90 kúnge jalǵasady. Oǵan álemniń 100-ge tarta memleketi men 10-ǵa jýyq halyqaralyq uıymdar qatysady dep kútilýde.
