Ekspertter tsenzýradan azat neırosetterdi atady

ASTANA. KAZINFORM — Ekspertter tsenzýradan azat neırosetterdi anyqtady. Jańartylǵan reıtıng Sansa Bench benchmarkisiniń ázirleýshileri daıyndaǵan derekterge sáıkes, OpenAI kompanııasynyń jańa modeli GPT-5.2 eń sońǵy orynǵa shyqty, dep jazdy 24 kg.

Sansa Censorship benchmarki neırosetterdiń paıdalanýshy suraýlaryn oryndaýdan bas tartý jıiligin baǵalaıdy: ball neǵurlym joǵary bolsa, model sonshalyqty az shekteýlerge ıe bolady.

Osy reıtıng boıynsha GPT-5.2 0,324 ball jınady, bul onyń aldyńǵy nusqalary men básekelesterinen áldeqaıda tómen. Mysaly, GPT-4o-Mini 0,765 ball, al Gemini 3 Pro Preview 0,824 ball alǵan. Reıtıngtiń kóshbasshysy bolyp Llama 3 8B-Instruct modeli shyqty — 0,853 ball.

Paıdalanýshylardyń pikirinshe, GPT-5.2 asa saqtyq tanytady. Mysaly, Reddit forýmynyń bir qoldanýshysy modeldiń ınternettegi alaıaqtyqty túsindirip berýden bas tartqanyn jazǵan, óıtkeni ol alaıaqtyq áreketterdi qoldaýǵa bolmaıtynyn alǵa tartqan.

GPT-5.2 ázirleýshileri synǵa jaýap retinde, jańartýdyń maqsaty modeldiń qaýipsizdigin arttyrý, prompt-ınektsııalarǵa tózimdiligin kúsheıtý jáne paıdalanýshylardy qaýipti taqyryptardan qorǵaý ekenin habarlady. Model endi paıdalanýshyǵa qaýipti bolýy múmkin suraýlarǵa sezimtal bolyp, mundaı jaǵdaılarda kómekke júginý jóninde usynystar beredi.

Bolashaqta ChatGPT-niń «eresekter rejımi» iske qosylǵanda jaǵdaı ózgerýi múmkin. Bul rejımtiń jospary 2026 jyldyń basyna belgilengen. Degenmen, OpenAI ókilderi ázirge paıdalanýshylardyń jasyn senimdi tekserý mehanızmi joq ekenin aıtty.

Eske sala keteıik, buǵan deıin Time jasandy ıntellekt jasaýshylardy «Jyl adamy» atady.