«Ekspert Qazaqstan» reıtıng agenttigi «BTA Bank» AQ kredıtke qabilettilik kórsetkishin «B+» deńgeıinde baǵalaıdy
ASTANA. QazAqparat - «Ekspert Qazaqstan» (RAEX) reıtıngtik agenttigi «BTA Bank» AQ kredıtke qabilettilik deńgeıin «B+» (kredıtke qabilettiliktiń jetkilikti deńgeıi) jáne oblıgatsııalarynyń senimdilik deńgeıin «B+» deńgeıinde (senimdiliktiń jetkilikti deńgeıi) rastaıdy. Bul týraly agenttiktiń baspasóz qyzmetinen habarlandy.
Agenttik málimetterine qaraǵanda, reıtıngtikke banktegi ózindik jeke kapıtaldyń jetkilikti joǵary deńgeıi, iri kredıttik táýekelderdiń joǵary dıversıfıkatsııasy, ssýdalyq portfel boıynsha rezervteý kórsetkishiniń tıimdi deńgeıi oń áser etýde. Budan bólek, agenttik sarapshylary banktiń baǵaly qaǵazdar portfeliniń joǵary sapasyn jáne banktiń fılıal jelileriniń joǵary damyǵanyn alǵa tartady.
Sonymen bir mezgilde, agenttik reıtıngti shekteıtin faktorlar retinde ssýdalyq portfeldiń salalyq shoǵyrlaný deńgeıiniń joǵarylyǵyn, rentabeldilik kórsetkishteriniń teris qalyptasqanyn jáne valıýtalyq táýekelderdiń joǵary deńgeıde bolýyn atap ótedi.
Budan bólek, reıtıngti tejeıtin faktorlarǵa joıý koeffıtsıentteri mániniń joǵary emestigi, múliktik kepildikti saqtaýdy qamsyzdandyrýdyń jetkiliksizdigin jáne kadrlar turaqsyzdyǵyn aıtady. «Máselen, aǵymdaǵy jyly bank ıeleri aýysty, bul óz kezeginde bıznes-úlgi men táýekelderdiń aýysýyna da áserin tıgizbeı qoımaıdy, operatsııalyq jáne qarjylyq qyzmettermen baılanysty táýekelder ósýi yqtımal», - deıdi reıtıngter bóliminiń basshysy J. Raısova.
Toqtala ketetin jaıt, aǵymdaǵy jyldyń 1 sáýirindegi jaǵdaı boıynsha Ulttyq banktiń renkıngine sáıkes, «BTA bank» elimizdegi ekinshi deńgeıli bankter arasynda aktıvter boıynsha 3-shi, ssýdalyq portfeli boıynsha 2-shi orynǵa ıe. Bul rette bank aktıvi 1 trln. 551,6 mlrd. teńgeni qurasa, jeke kapıtaly - 234,6 mlrd. teńgege jetken edi.
