«Ekspert Qazaqstan RA» agenttigi «Qazaqstan Halyq Banki JZQ» AQ reıtıngin «A++» deńgeıine kóterdi
ASTANA. 7 naýryz. QazAqparat - «Ekspert Qazaqstan RA» reıtıng agenttigi «Qazaqstan Halyq Banki Jınaqtaýshy zeınetaqy qory» AQ-nyń senimdilik reıtıngin 1 qańtar 2012 jylǵy monıtorıng sheńberinde «A++» (senimdilik deńgeıiniń eń joǵary reıtıngi) deńgeıine
kóterdi. Bul týraly agenttiktiń baspasóz qyzmetinen habarlandy.
Jınaqtaýshy zeınetaqy qorynyń reıtıngine oń áser etken faktorlardyń arasynda ózindik kapıtaly jetkiliktiliginiń joǵary kórsetkishteri (01.01.2012 jylǵy kórsetkish boıynsha 0,08), qordyń ornyqty naryqtyq ustanymy (naryqtaǵy úlesi - 33,1 paıyz), ınvestıtsııalyq portfel táýekeliniń tómengi deńgeıi atalyp ótiledi. Budan bólek, JZQ-nyń zeınetaqy jınaqtary aýdarylymynyń oń saldosy (2011 jyly aýdarym saldosy 41,3 mlrd. teńge), ınvestıtsııalyq portfel ótempazdyq deńgeıiniń joǵarylyǵy da reıtıngke áser etken.
Sonymen qatar, sarapshylar pikirinshe, reıtıngtik baǵalaý deńgeıiniń shektelýine valıýtalyq táýekeldiń joǵary deńgeıi, sondaı-aq 2011 jyldyń ekinshi jartysyndaǵy taza ınvestıtsııalyq tabys qorynyń tómendeýi áser etken. Budan bólek, teris komıssııalyq syıaqy boıynsha kredıtorlyq borysh túrindegi mindettemelerdiń paıda bolýy da reıtıngtik baǵalaýǵa keri áser etip otyr. «Jalpy alǵanda ınvestıtsııalyq tabystyń qysqarýynan týyndaıtyn qordyń qarjylyq kórsetkishteriniń nasharlaýyn boljaımyz, alaıda JZQ-nyń joǵary qarjylandyrylýy aǵymdaǵy deńgeıdiń saqtalýyna múmkindik beredi. Biraq ınvestıtsııalyq qyzmet kórsetkishteriniń odan ári nasharlaǵan jaǵdaıynda qordyń reıtıngi tómendetýge qaraı qaıta qaralýy múmkin», - deıdi «Ekspert Qazaqstan RA» bas dırektorynyń orynbasary Arman Jahın.
Esterińizge sala keteıik, «Qazaqstan Halyq Banki» JZQ zeınetaqy qyzmeti naryǵynda 1998 jyldyń qańtarynan qyzmet etedi, onyń fılıaly barlyq oblystarda bar. Qarjylyq qadaǵalaý komıtetiniń málimetterine sáıkes, 1 qańtar 2012 jylǵy jaǵdaı boıynsha qordyń zeınetaqylyq jınaqtary 877,5 mlrd teńgeni, zeınetaqy salymdary - 665,3 mlrd teńgeni, «taza» ınvestıtsııalyq tabys somasy - 178,0 mlrd teńge, ózindik kapıtal mólsheri - 27,3 mlrd teńgeni qurady.
