Ekspedıtsııa kezinde kóligi buzylǵan sheteldik Kazinform agenttiginen kómek surady
AQTÓBE. KAZINFORM – Polshada turatyn Pavel Maevskıı qaıyrymdylyq ekspedıtsııasyna shyǵyp, buzylǵan kóligin Aqtóbeniń Saǵashıli aýylynda qaldyryp ketken. Kazinform aqtóbelik pen sheteldik arasyndaǵy baılanysty qaıta jalǵaýǵa kómek kórsetti.
Ózin Pavel Maevskıı dep tanystyrǵan sheteldik redaktsııanyń elektrondy poshtasyna hat joldady. Aıtýynsha, naýqas balalardyń emine aqsha jınaý úshin 2025 jyly qaıyrymdylyq marafonyna attanǵan.
EAEO terrıtorııasyna Qyrǵyzstan arqyly kirgen sheteldiktiń kóligi Aqtóbe jerindegi Saǵashıli aýyly mańyna kelgende buzylyp qalady.
Osylaısha byltyr jazda kóligin jergilikti turǵyn Ǵabıden Ahanovqa senip tapsyrǵan.
— Kólik buzylǵan kezde jóndeıtin adamdy taptym. Ol mashınany qarap, qosalqy bólshek qajet ekenin aıtty. Al munda Fiat kóligine qajettisi tabylmady. Sóıtip men Polshaǵa jetken soń izdep taýyp, qaıtyp keletinimdi jetkizdim. Mekenjaıdy, telefon nómirin de jazyp aldym. Bul — Aqtóbe oblysy Muǵaljar aýdany Saǵashıli aýyly. Polshaǵa ushaqpen jetip, mehanıkke qońyraý shaldym. Ol maǵan jaýap bermedi. Keıin qosalqy bólshekti jiberip, kólikti alyp ketetinimdi, ne bolmasa kólikti Qazaqstanda qaldyratynymdy aıttym. Habarlama jibergende onyń telefon nómiri sónip turdy. Kólik quny arzan bolǵan soń (Polshadaǵy baǵasy 500 dollar — Pavel Maevskıı) Qazaqstanǵa nemese Qyrǵyzstanǵa qaldyrý jolyn suradym (EAEO terrıtorııasyna Qyrǵyz Respýblıkasy arqyly kirgen — red.). Onyń óz zańdylyǵy bar eken, — dep jazady ol.
Sheteldik azamat birneshe ret kólik jóndeýshimen arada baılanys ornatýǵa tyryssa da, retin taba almaǵan. Ári ózi de sol ketkennen Qazaqstanǵa kelmegen. Aıtýynsha, munyń bári ony keden salyǵynan bosatpaıdy. Al qujatyn zań aıasynda rettemese ol budan ári EAEO aýmaǵyna kire almaýy múmkin.
Shetel azamaty Qazaqstan men Qyrǵyzstannyń salyq komıtetinen jaýap ta alypty. Talap boıynsha kólikti ıesi alyp ketýi tıis nemese aldymen sáıkestik sertıfıkatyn rásimdeıdi.
— Eń tıimdi joly — kólikti alyp ketý. Evakýator jaldasa da bolady. Bir jyldyń ishinde alyp ketkeni abzal. Qazaqstan emes, EAEO-ǵa kirgen jeri, ıaǵnı Qyrǵyzstan shara qoldanady. Eger bir ret aıyppul salsa, ortaq bazadan únemi kórinip turady. Al eger elde qaldyrýǵa sheshim qabyldasa aldymen sáıkestik sertıfıkatyn alady. Ol úshin kólik jóndeýden ótip, júrip turýy tıis. Sertıfıkattan soń kedendik rásimdeý júredi. Munyń bári ýaqytty qajet etedi, — deıdi Aqtóbe oblystyq memlekettik kirister departamentiniń basqarma basshysy Serik Saımanov.
Al kólikti alyp qalǵan aqtóbelik Ǵabıden Ahanovtyń aıtýynsha, ol aldymen jolaýshyny qonaq qylyp, keıin jolǵa shyǵaryp salǵan. Keri baılanys úshin mekenjaıyn, telefon nómirin de jazyp beredi.
— Kólik buzylyp qalyp, maǵan súırep ákeldi. Sol kezde mende jóndep beretin qosalqy bólshek bolmady. Al olardyń vızasynyń ýaqyty aıaqtalyp qalǵan. Taksı jaldap, eline ketti. Aldymen garajda turǵan edi. Birer aıdan soń jóndep, syrtqa shyǵaryp qoıdym. Ózim jóndeý jumysyn júrgizemin, tapsyrys alý úshin garajdyń ishin bosatý kerek boldy. Sheteldik kelip, qarjysyn tólep alyp ketse bolady. Men 70 myń teńgege qosalqy bólshek aldym. Jumysty qosyp, 250 myń teńge suraımyn. Baılanys nomerin berdim, aty-jónimdi jazdym. Qazaqtyń saltymen qonaq boldy, — deıdi aqtóbelik.
Onyń aıtýynsha, alǵashqy kelisim boıynsha sheteldik azamat qosalqy bólshekti Polshadan ákelmek bolǵan. Biraq ekeýi sodan keıin habarlasa almapty.
Kazinform kólik ıesi men aqtóbelik azamat arasynda baılanys ornatty. Pavel Maevskıı baılanys nomeriniń bir ǵana sanyn qate tergen bolyp shyqty.
Ol aldaǵy ýaqytta kelip, kóligin alyp ketýdi josparlap otyr.