EKSKLıÝZIV: Polshalyq qarııa Qazaqstannan izdegen otbasyn Reseıden tapty

QazAqparattyń saýalyna jaýap qatqan Makınsk selolyq okrýginiń ákimdigindegiler biraz jaıdyń betin ashty. Mırınchýk otbasy shynymen de Birjan sal aýdanynyń Makınka aýylynda turyp, keıin 90-shy jyldary Reseıge qonys aýdarǵan. Olar bizge Ýstınıanyń 58 jastaǵy nemeresi Tatıana Mırınchýkpen baılanysqa shyǵýǵa kómektesti. Búgingi tańda Tatıana Reseıdiń Omby qalasynan 58 shaqyrym qashyqtyqta ornalasqan Omby oblysy Marıanovka kentinde turady.

«Mırınchýk Ýstınıa Vasılevna - meniń ájem. Men onyń ortanshy uly Petrdiń úlken qyzymyn. Polıaktardyń, onyń ishinde Iza táteıdiń bizdiń úıge kelgeni áli esimde. Olar ájemniń úıinde boldy, ákem men ájem olardy qushaq jaıa qarsy aldy. BAQ-ta jarııalanǵan sýretterdegi - Iza táteı», - dedi QazAqparat tilshisine Tatıana.

Ókinishke qaraı, 1910 jyly týǵan Ýstınıa o dúnıelik bolǵan.

«Naýryz aıynda onyń baqılyq bolǵanyna 34 jyl tolady. Al, atamyz Maksım Andreevıch 1988 jyly qaıtys boldy. Ákemiz de 1993 jyly dúnıeden ótti. Ótken jyly anamyz da marqum boldy. Ákemiz qaıtys bolǵan soń anamyzdy jalǵyz qaldyrmaıyq dep Reseıge alyp kettik», - deıdi nemeresi.

Tatıananyń sózinshe, Ýstınıanyń úlken uly Rostov oblysynda turdy. Onyń eki balasy qaldy. Ortanshy uldan týǵan qyzdyń otbasy Omby oblysynda jáne Germanııada turady. Al, kishi ulynyń týystary Almaty oblysynda turyp jatyr. Úlken uly Anatolıı men kishi uly Vıktor Polshaǵa qonaqqa bardy.

Degenmen, materıal ázirlenip jatqanda Tatıana Mırınchýk Kyzylorda-news.kz bas redaktorynyń orynbasary Jánibek Isaevqa habarlasyp úlgeripti.

«Ýlamen Feısbýk arqyly baılanystamyn. Álginde ǵana oǵan Tatıananyń koordınattaryn jiberdim. Biz bul oqıǵany odan ári qadaǵalap, jalǵasy ne bolǵanyn aıtamyz», - dedi QazAqparat tilshisine telefon arqyly J.Isaev.

Óz kezeginde pan Ýla bul oqıǵaǵa beı-jaı qaramaı, kómek qolyn sozǵandarǵa rızashylyǵyn bildirdi.

«Mırınchýk otbasyn izdeýge kómekteskenderge kóp rahmet. Arada kóp jyldar ótse de, biz Ýstınıa Mırınchýktiń jomart júregi men kómegin umytqan joqpyz jáne olarǵa alǵysymyz sheksiz», - dep jazdy ol QazAqparat tilshisine.

Eske sala keteıik, ótken ǵasyrdyń alǵashqy jartysynda Qazaqstanǵa jer aýdarylǵan Ýla Kotarbanyń otbasyna Makınka aýylynyń turǵyny Ýstınıa Mırınchýk kómektesken bolatyn. Ol jer aýyp kelgen polıaktardy qamqorlyǵyna alyp, sońǵy nanymen bólisken edi. Soǵystan keıin Izabella Polshaǵa qaıta oraldy. Qos otbasy biraz ýaqyt habarlasyp, qal-jaǵdaı surasyp turdy. Alaıda, keıin baılanys úzildi. Internet arqyly izdeý nátıje bermegen soń qarııa Ýstınıa Mırınchýktyń otbasyn tabý úshin Kyzylorda-news.kz redaktsııasy arqyly qazaqstandyqtardan kómek suraǵan edi.

Avtor: Oksana Matasova