Ekshn-fılmderdiń II Halyqaralyq kınofestıvali Astana kúnine arnalǵan merekelik is-sharalardyń bastaýy bolmaq

Búgin elordada ekshn-fılmderdiń II Halyqaralyq «ASTANA» kınofestıvaline arnalǵan baspasóz máslıhatynda Astana qalasy ákimdigi Mádenıet basqarmasynyń bastyǵy Bolat Majaǵulov osylaı aıtty.

Onyń habarlaýynsha, bıyl shildeniń 1-5-i kúnderi ekshn-fılmderdiń II Halyqaralyq «ASTANA» kınofestıvaliniń barlyq merekelik is-sharalary Astanadaǵy Beıbitshilik pen kelisim saraıynda ótedi. «Al, eń bastysy, bul festıval Táýelsizdiktiń 20 jyldyǵy aıasynda ótetindikten, ony erekshe salatanatpen uıymdastyrý josparlanyp otyr. Jalpy, shildeniń 1-i kúni bastalatyn kınofestıval Astana kúnine arnalǵan barlyq merekelik is-sharalardyń bastaýy bolmaq», - dep atap kórsetti B.Majaǵulov.

Kınofestıvaldiń bas dırektory Iren Vanıdovskaıa atap kórsetkendeı, shildeniń 1-i kúni bolatyn kınofestıvaldiń ashylý saltanaty Beıbitshilik pen kelisim saraıynda ótpek. Osydan bastap bul jerde kúnde álemdik kınotýyndylardyń gala-premeralary uıymdastyrylady. Al festıvalge qatysýshy barlyq ekshn-fılmderdiń kórsetilimi «Han shatyrda» bolady. Sondaı-aq kınofestıval barysynda stsenarııler konkýrsynyń jeńimpazdary anyqtalmaq. Festıvaldiń qonaqtary - Gosha Kýtsenko, Evgenıı Stychkın, Olga Sýtýlova jáne taǵy basqa reseılik kınojuldyzdar. «Golıvýdtan keletin akterler de bar. Biz olardyń attaryn keıingi ýaqytta jarııalaıtyn bolamyz. Negizi, byltyr kınofestıval aıasynda 26-dan astam san alýan is-sharalar uıymdastyryldy. 120 sheteldik qonaq pen 10 myńnan astam adam osy is-sharalarǵa qatysty. Bıylǵy kınofestıvaldiń deńgeıi men aýqymy odan tómen bolmaıdy dep senemiz», - deıdi I.Vanıdovskaıa.