Ekshn-fılmderdiń halyqaralyq «ASTANA» kınofestıvalinde prokatqa shyqpaǵan álemdik fılmder usynylady
ASTANA. Maýsymnyń 10-y. QazAqparat /Jasulan Amanbaıuly/ - Ekshn-fılmderdiń halyqaralyq «ASTANA» kınofestıvalinde kınoprokatqa shyǵyp úlgermegen álemdik fılmder usynylady. Bul týraly búgin Astanada sharanyń uıymdastyrý komıtetiniń qatysýymen ótken baspasóz máslıhatynda Festıvaldiń bas dırektory Iren Vanıdovskaıa málim etti,
dep habarlaıdy QazAqparat.
Festıvaldiń bas dırektory Iren Vanıdovskaıanyń aıtýynsha, Astanaǵa boksshy Maık Taıson óziniń «Taıson» atty fılmin alyp keledi. «Matrıtsa» fılmindegi trıýkterdiń qoıýshysy Vý Pıng «Naǵyz ańyz» atty aınalymǵa shyǵyp úlgermegen 3D formatyndaǵy jańa kınosyn usynady. «Zolotoe sechenıe», «Gadkıı ıAn» álemdik premeralary ótetin bolady. Festıvaldiń ashylýynda bas kıno retinde rejısser Mıkael Hafstremniń «Shanhaı» kınosy tańdalyp alyndy. Qazaqstan kınolarynyń ishinde Igor Tsaıdiń «Tsýg-Tsvang» atty týyndysy kórsetiledi. Fılmderdiń naqty bekitilgen baǵdarlamasy maýsymnyń 14-i kúni www.astanafestival.kz saıtynda jarııalanady.
Maýsymnyń 27-si men shildeniń 1-i kúnderi Astanadaǵy «Qazaqstan» kıno-kontserttik zalynda ótkiziletin festıval aıasynda Azııa, TMD jáne AQSh-tyń, Eýropa rejısserleriniń «ekshn» janryndaǵy 30-ǵa tarta kınosy men anımatsııalyq fılmderi kórsetiletin bolady.
Festıval Qazaqstan jerinen shyqqan álemge áıgili rejısser Tımýr Bekmambetovtiń bastamasy. «ASTANA» kınofestıvaline Reseıdiń tanymal Vladımır Mashkov, Andreı Chernyshov, Ekaterına Reznıkova, Dmıtrıı Pevtsov, Dmıtrıı Haratıan syndy akterleri elordaǵa at basyn tireıdi. Sonymen qatar qonaqtardyń ishinde akter Dolf Lýndgren bar.
Uıymdastyrýshylardyń atap kórsetkenindeı, kınofestıvaldiń basty maqsaty - otandyq kınoóndirisin damytý jáne dúnıe júzine Qazaqstan atyn áıgileý.
«Astana shaqyrylǵan álemdik kınonyń «juldyzdaryn», tanymal akterlerin, prodıýserleri men rejıserlerin qabyldaýǵa jáne osynaý álemdik sharany ótkizýge daıyn. Bunda jol, kınozaldar, qonaqúıler men tamaqtandyrý máseleleri sheshimin tapqan», deıdi I. Vanıdovskaıa.
