Ekshn-fılmderdiń «Astana» halyqaralyq festıvalinde jeńiske jetken «Apollon-18» fılminiń túsirilimi aıaqtalý ústinde - T.Bekmambetov

Eske salaıyq, Ekshn-fılmderdiń «Astana» halyqaralyq festıvali Astananyń týǵan kúnin atap ótý aıasynda byltyr alǵashqy ret ótkizildi. Festıvaldyń uıymdastyrýshysy jáne prezıdenti - ekshn-fılmderdiń álemdik rejısseri Tımýr Bekmambetov.

Elorda kúni qarsańynda ashylyp, birneshe kúnge jalǵasatyn halyqaralyq festıval barysynda jas kınorejısserlardyń áli túsirilmegen kartınalarynyń jobalary tanystyrylyp, jeńimpazdar anyqtalady.

«Bıyl jyldaǵydaı, fılmderdiń arasynda baıqaý bolmaıdy, baıqaý tek aldaǵy ýaqytta túsirilmek kartınalardyń arasynda ótedi», - dep atap ótti T.Bekmambetov.

Ótken jyly festıval barysynda álemniń túkpir-túkpirinen túsken myńǵa jýyq ótinimderdiń arasynda iriktep alynǵan - bes joba qatysty. Kıno óneriniń maıtalmandarynan quralǵan qazylar alqasy tańdaýlaryn jas rejısserlar, aǵaıyndy Vaınshteındardyń «Apollon-18» fılmine bergen bolatyn.

Búgin T.Bekmambetov, «Astana» festıvalindaǵy jeńisinen keıin «Apollon-18» fılminiń túsirilimi kóp uzamaı bastalǵanyn aıtty. «Dimension Films» stýdııasynda túsirilip jatqan kartına jospar boıynsha ústimizdegi jyldyń qyrkúıeginde amerıkalyq kórermenderge jol tartpaq. «Fılmniń ataýyn «Gýgl»-ǵa engizip, izdep kórseńizder, kórermender bul fılmdi taǵatsyzdana tosyp júrgenin kóre alasyzdar», - dedi rejısser.

«Bıyl festıval aıasynda kezekti baıqaý ótedi. Biz ótinimderdi álem boıynsha aldyq. Los-Anjeleste olardyń arasynan ádettegideı 5 jobany tańdap aldyq. Sondaı-aq, Qazaqstannyń kınematografısterinen 5 jumysty qabyldadyq. Jas kınematografıster festıval aıasynda kezekti ret ózderiniń jobalaryn tanystyrý múmkindigine ıe bolady. Onyń sońynda biz bir ǵana jobany tańdap alamyz. Ony bir jyl ishinde fılge aınaldyryp, ekranǵa shyǵaramyz», - dep túıindedi sózin T.Bekmambetov.

Álemdik rejısser atap kórsetkendeı, Ekshn-fılmderdiń «Astana» halyqaralyq festıvalin jańa fılmder týyndaıtyn alań retinde aıtýǵa bolady.